थौं थःने क्वःने भैलःखः सालीगु

ख्वप (सन्ध्या टाइम्स)/ख्वपया दकलय् तःजिगु जात्रा बिस्काः जात्रा थौं लिपांगु दिं तक शान्तिपूर्ण रुपं न्ह्यानाच्वंगु दु। थौं लिपांगु दिं सुथय् तालाक्व त्वाः(कुम्हाः त्वाः)लय् थनातःम्ह यःसिं क्वःथल। सनिलय् गाःहितिइ दिकातःगु भैलखः थकयाः थःनें क्वःनें सालाः टौमढीइ थातय् लाकाः द्यः थहांबिज्याकाः बिस्काः जात्रा क्वचायेकी। त्वाःत्वालय् क्वत हयातःपिं द्यःपिंत म्हिगः न्हिच्छि द्यःसगं बियाः सनिलय् थहांबिज्याकूगु खः। थुगुसी थगुने नगुने स्वयां शान्तिपूर्ण रुपं छुं ल्वापु ख्यापु मदयेक जात्रा क्वचायेकूगुलिं ख्वपवासीत लय्ताःगु दु। जात्राय् थगुने छम्ह मनू सीगु खः ।