थौं १५ गू पार्टीया मिसातपाखें प्रदर्शन

येँ (सन्ध्या टाइम्स)/संविधानसभाय् दुथ्याःगु एकिकृत माओवादी, नेपाली कांग्रेस, एमाले नापं झिंन्यागू राजनीतिक पार्टीया मंकाः संजाल अन्तर पार्टी महिला संजालं थौं येँय् तःजिक विरोध प्रर्दशन यायेगु ग्वसाः ग्वयातःगु दु ।

छुं दिं न्ह्यः जक बर्दियाय् नेपाली सेनापाखें स्वम्ह मिसातय्त बलात्कार यानाः स्यानाबिउगु, धनुषाय् मिसायात प्रहरी चौकीइ हे प्रहरीतय्सं बलात्कार याःगु नापं थीथी कथंया घटनाय् दोषीयात कारवाही यायेमाःगु नापं दण्डहीनताया अन्त्य यानाः शान्ति सुरक्षाया ब्यवस्था यायेमाःगु माग यानाः थौं प्रदर्शन यायेत्यंगु खँ संजालं धाःगु दु। येँया शान्तिवाटीका लागां न्ह्याइगु उगु र्‍यालीइ मानवअधिकारवादी नापं थीथी खलः पुचःया प्रतिनिधि व नागरिक समाजया न्ह्यलुवातय्सं नं ब्वति काइगु संजालया नायः नापं एकिकृत माओवादीया केन्द्रीय दुजः शशि श्रेष्ठं धयादीगु दु। उगु प्रदर्शन थीथी लागा चाःहिलाः हाकनं व हे थासय् थ्यंकाः सभा यायेगु ग्वसाः ग्वयातःगु दु। वय्कलं आः याकनं हे संजालपाखें थप संघर्षया ज्याझ्वः पितबीत्यनागु नं जानकारी बियादीगु दु ।