छवाःया कारोबारं नेप्से च्वय्
येँ (सन्ध्या टाइम्स)/ नेपाल स्टक एक्सचेन्जया शेयर कारोबार थ्व वालय् नेप्से परिसुचक थहां वंगु दु। थ्व वालय् प्यन्हु जक जूगु शेयर कारोबारं नेप्से परिसुचक ५ दशमलव ५० अंकं थहां वंगु स्टक एक्सचेन्जं जानकारी बिउगु दु। थ्व वालय् न्हापांगु न्हि ४४३ दशमलव ५४ अंकं शुरु जूगु शेयर कारोवार वाःया लिपांगु न्हि ४४९ दशमलव ०४ अंकय् थ्यंकाः कारोबार बन्द जूगु खः ।
स्टक एक्सचेन्जया कथं नेप्से परिसुचक थहां वंसा कारोबार ल्याः धाःसा मेमेगु वाःया तुलनाय्. कुहां वःगु दु। थ्व वालय् चय्च्यागू कम्पनीया २२७७ कारोबारय् स्वंगू लाख स्वीप्यद्वः व गुसः कित्ता शेयर न्याये-मी जुयाः झिंछगू करोड न्यय्गू लाख नीन्हय्द्वः तका दांया कारोबार जूगु दु ।
थ्वयां न्ह्यः वंगु वालय् ३८१८ कारोबारं स्वंगू लाख स्वीच्याद्वः कित्ता शेयर न्याये-मी जुयाः झिंछगू लाख ख्वीखुद्वः व ग्वीद्वः तका दांया कारोबार जूगु खः। दांया ल्याखं थ्व वाःया कारोबार १ दशमलव ४३ प्रतिशत कुहां वःगु दु ।
उखे 'क' वर्गय् लाःगु समुहया कारोबार सुचक सेन्सेटिभ नं थ्व वाःया शेयर कारोबारं थहां वंगु दु। वाःया न्हापांगु न्हि १०८ दशमलव २१ अंकं शुरु जूगु थुगु समुहया कारोबार १ दशमलव ९५ अंकं थहां वनाः लिपांगु न्हि ११० दशमलव १९ अंकय् थ्यंकाः बजाः बन्द जुल ।
अथे हे थुगु समुहया कारोबार प्यंगू करोड ख्वीप्यंगू लाख तका दांया कारोबार जूगु दु। थ्व नेप्सेय् जूगु कूल कारोबारया ४० दशमलव ३६ प्रतिशत खः ।
शेयर कारोबार जूगु कम्पनीइ थ्व वाःया दुने निगू करोड झिगू लाख दां, ग्वीछद्वः कित्ता शेयर व २८५ क्वः कारोबार याःगु लिधंसाय् फेवा फाइनान्स कम्पनी दकलय् न्ह्यःने लाःगु दु ।
थ्व वालय् रेसुङ्गा विकास बैंक, एशियन लाइफ इन्स्योरेन्स कम्पनी व पाथिभरा विकास बैंकया साधारण शेयर, पाटन फाइनान्स व वीरगंज फाइनान्सया हकप्रद शेयर व प्राइम कमर्सियल बैंक, नेपाल एसबीआई बैंक व लक्ष्मी बैंकया बोनस शेयर धितोपत्रय् बोर्डय् सुचीकृत जूगु दु ।
