गम्भीर परिणाम भोगे यायेमालीगु प्रचण्डया ख्याच्वः
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' देय्या शान्ति प्रकृया तसकं जटिल मोडय् थ्यंगुलिं सहमति कायम यायेत लिबाःसा गम्भीर परिणाम भोगे यायेमालीगु ख्याच्वः बियादीगु दु ।
माओवादी समर्थित प्राध्यापक संगठनं विक्रम संवतया २०६७ न्हूदँया लसताय् शनिवाः यलय् याःगु तुच्चा ज्याझ्वलय् अध्यक्ष प्रचण्डं शान्ति प्रकृयायात लिच्वःलय् थ्यंकेत सहमति आवश्यक जूगु धयादिसें अज्याःगु सहमति तत्कालया निंतिं राष्ट्रिय सरकार गठन यायेगु जूगु धयादिल । समग्र शान्ति प्रकृया व संविधान च्वयेगु ज्याय् प्यखेरं षड्यन्त्र जुयाच्वंगुलिं नं सहमति मार्फत अज्याःगु षड्यन्त्रयात परास्त यायेमाःगु खँय् वय्कलं बः बियादिल ।
वय्कलं झिंनिगू बुँदे समझदारी जूगु इलय् थःगु पार्टी व नेपाली कांग्रेसया तत्काली सभापति गिरिजाप्रसाद कोइराला दथुइ न्हूगु संविधान निर्माण मजुतल्ले सहमतीय प्रणालीलय् वनेगु सहमति जूगु दाबी यानादिसें अज्याःगु सहमतीय प्रणालीयात परिवर्तन यायेवं दलत दथुइ गतिरोध वःगु धयादिल ।
संविधानसभाया चुनावलय् माओवादीं हःगु मतया कारणं कांग्रेस व एमालें सहमतीय प्रणाली स्यंकेगु ज्या याःगु द्वपं बियादिसें प्रचण्डं राष्ट्रिय सहमतिया सरकार गठन मजुइकं न्ह्याक्वः हे ई थप याःसां संविधान निर्माण दाबी यानादिल ।
