'माओवादीया सत्ता वःसा प्रजातन्त्र समाप्त'
नेपाली कांग्रेसया कार्यवहाक सभापति सुशील कोइरालां एनेकपा (माओवादी)या सत्ता वःसा प्रजातन्त्र समाप्त जुइगु सम्भावना दुगु खँ धयादीगु दु । वय्कलं वर्तमान अवस्थाय् छुं नं हालतं माओवादी नेतृत्वया सरकार वइगु वा सरकार परिवर्तनया सम्भावना मदुगु धयादिल ।
शनिवाः प्रेस युनियन नेपालगञ्जं ग्वसाःग्वःगु पत्रकार नापलायेगु ज्याझ्वलय् वय्कलं माओवादीं झिंनिगू बुँदे सहमति निसें हे सम्झौता पालना मयाःगु व उल्टां थीथी सर्त थप यानाः देय्यात बर्बाद यायेगु पाखे लगेजुयाच्वंगु द्वपं बियादिल ।
माओवादीं म्हुतुं संविधान धकाः धाःसां समस्या ब्वलंकाः सत्ता कब्जा यायेगु कुतः यानाच्वंगु धयादिसें कोइरालां इलय् हे संविधान निर्माण मजुसाः उकीया दोष माओवादीं कायेमाःगु धयादिल । वय्कलं माओवादीं कब्जा यानातःगु छेँबुँ लितमब्यूगु व वाइसियलं धम्की बियाच्वंगु धइगु प्रजातन्त्र प्रति प्रतिबद्ध मजूगु प्रमाण जूगु दाबी यानादिल । वय्कलं तानाशाही जूगुलिं हे देशं राणा शासन व पञ्चायत पलायन जूगु न्ह्यथंनादिसें माओवादीं नं अथेहे पलायन जुइगु धयादिल ।
वय्कलं माओवादी रुपान्तरण जूगु प्रमाण अझं मदुनिगुलिं माओवादीं सरकार माल धायेवं सुनां नं सरकार मत्वतीगु धयादिल । सेना समायोजन व पुनर्स्थापना सम्बन्धी बैठकय् माओवादीं ब्वति मकाःगुलिं माओवादी समस्या समाधान प्रति गम्भीर व जिम्मेवार मजूगु प्रमाण जूगु खँ वय्कलं धयादिल ।
