एमआरपी प्रकरणं भारतनापया स्वापू ख्वाउँल : सुजाता
उपप्रधान नापं परराष्ट्रमन्त्री सुजाता कोइरालां मेसिन रिडेवल पासपोर्ट (एमआरपी)या प्रकरणं भारत नापया स्वापू ख्वाउँगु खँ धयादीगु दु । वय्कलं नेपाःया हरेक ख्यलय् ग्वाहालि यानावयाच्वंगु भारत लिप्पांगु निर्णयं दुःखी जूगु धयादिसें भारत नापया स्वापू स्यंके मज्यूगु धयादिल ।
शनिवाः सुथय् थःगु हे छेँय् पत्रकारत नाप खँल्हाबंला यानादिसें वय्कलं एमआरपीया सम्बन्धय् सरकारं हथाय्सं निर्णय काःगु धयादिसें एमआरपी भारतय् छापे यायेबीगु निर्णय सरकारं लितकयाः द्वंकूगु द्वपं बियादिल ।
एमआरपीया विषयलय् सर्वोच्च अदालतय् मुद्दा विचाराधिन दुगु इलय् हे सरकारं अदालतया निर्णय मप्यूसें हथाय्सं निर्णय काःगु धयादिसें थुकीं नेपाः व भारत दथुइया कुटनीटिक स्वापूइ नकारात्मक लिच्वः लिकीगु दावी यानादिल ।
थीथी ख्यःया विरोध लिपाः चैत्र २९ गते च्वंगु मन्त्रिपरिषद्या बैठकं एमआरपी भारतय् छापे याकेबीगु निर्णय लितकाःगु प्रति असन्तुष्टि प्वंकादिसें मन्त्री कोइरालां थुकीया बारे सरकारं क्याबिनेटया बैठक सःताः दुःख प्वंकेमाःगु धयादिल ।
