सहमतिय प्रणालीलय् वनेत एमाले सभासद्तय् सुझाव
नेकपा (एमाले)या सभासद्तय्सं सहमतिय प्रणालीयात हानं लागू यायेमाःगु सुझाव ब्यूगु दु । छुं न्हि निसें सिंहदरवारय् दुगु पुलांगु प्रतिनिधिसभा भवनाय् न्ह्यनाच्वंगु एमालेया संसदीय दलया शुक्रवा: च्वंगु बैठकय् न्ववापिं सभासद्तय्सं सहमतिय प्रणालीयात संशोधन यानाः बहुमतिय प्रणालीलय् वंगुलिं हे थौं राष्ट्रिय राजनीतिलय् समस्या वःगु धासें हानं सहमतिय प्रणालीलय् वनेमाःगु सुझाव ब्यूगु दु ।
सभासद्तय्सं संविधानसभाया म्याद थप याःसां सहमति कायम मजुइकं संविधान जारी यायेमफइगु धासें सहमतिय अवधारणालय् वनेगुया विकल्प मदुगु बिचाः प्वंकूगु ख: । न्हापा सहमतिय प्रणालीयात संशोधन यनाः बहुमतिय प्रणालीया प्रावधन दयेकेगु ज्या गम्भीर गल्ती जूगु धासें हानं अन्तरिम संविधानयात संशोधन यानाः सहमतिय प्रणाली नालेमाःगु बिचाः प्वंकूगु खः ।
अथेहे शुक्रवाः न्ववापिं सभासद्तय्सं नं सरकारया ज्या प्रति असहमति प्वंकूसें शान्ति प्रकृयायात निष्कर्षय् थ्यंकेत व संविधान जारी यायेत वर्तमान सरकारं राजीनिमा यायेमाःगु माग याःगु दु ।
एमाले संसदीय दलया मेगू बैठक आइतवाः च्वनीगु जूगु दु ।
