राष्ट्रपति व प्रम दथुइ जेठ १४ लिपाया अवस्थाया बारे सहलह
राष्ट्रपति डा. रामवरण यादव व प्रधानमन्त्री माधवकुमार नेपाल दथुइ जेठ १४ गते न्हूगु संविधान जारी मजूगु अवस्थाय् गज्याःगु प्रकृया नालेगु धइगु विषयलय् सहलह जूगु दु ।
राष्ट्रपति भवन शितल निवासय् शुक्रवाः न्हिनय् जूगु खँल्हाबंलाय् प्रधानमन्त्री माधवकुमार नेपालं माओवादीं ग्वाहालि मयागुलिं इलय् हे संविधान जारी यायेमफइगु अवस्था ब्वलंगु धकाः जानकारी बीवं निम्ह नेतात दथुइ जेठ १४ लिपा ब्वलनीगु राजनीतिक अवस्थाया बारे सहलह जूगु खः ।
नियमित खँल्हाबंलाया झ्वलय् राष्ट्रपति निवास थ्यंकादीम्ह प्रधानमन्त्रीं माओवादीया असहयोगया कारणं शान्ति प्रकृयायात सार्थक निष्कर्षय् थ्यंकेत व इलय् हे संविधान जारी यायेत थाकूगु धयादिल । नापं संविधान जारी यायेगु ई सतिनाच्वंगु इलय् नं माओवादी गम्भीर मजूगु धयादिसें प्रधानमन्त्रीं जानकारी बियादिल ।
अथेहे प्रधानमन्त्रीं शान्ति प्रकृयायात सार्थक निष्कर्षय् थ्यंकेत थःम्हं कुतः यानाच्वनाःगु धयादिसें शुक्रवाः हे खुगू दलया शीर्षस्थ नेतातय्त सःताः शान्ति प्रकृयाया प्रगतिया बारे जानकारी बियागु धयादिल ।
उगु इलय् राष्ट्रपति डा. रामवरण यादवं दलत दथुइ सहमति व सहकार्य याना: निर्धारित गन्तव्यय् थ्यंकेमाःगु खँय् बः बियादिल ।
