संविधान जारी मजुइकं संविधानसभा विघटन जुइमखु : पोखरेल
सूचना व संचार मन्त्री शंकर पोखरेलं न्हूगु संविधान जारी मजुइकं संविधानसभा विघटन मजुइगु खँ धयादीगु दु । न्हापा संविधानसभाया मिति नं स्वक्वः तक सारे याःगु खँ धयादिसें न्हूगु संविधान जारी व शान्ति प्रकृया पूमवंतल्ले संविधानसभां न्ह्यानांतुं च्वनीगु दावी यानादिल ।
राष्ट्रिय युवा नेतृत्व मञ्चं शुक्रवाः निसें शुरु याःगु स्वन्हुन्यंकया ज्याझ्वःया यलय् उल्लेज्या यानादिसें मन्त्री पोखरेलं राजनीतिक सहमति जुसाः थःपिं सरकार त्वःतेत तयार जूगु धयादिल । वय्कलं राष्ट्रिय सहमति बिना न्हाम्ह प्रधानमन्त्री जुसां नं शान्ति प्रकृया व संविधान निर्माण जुइमफइगु धयादिल ।
अथेहे वय्कलं माओवादीयात नागरिक पार्टीलय् रुपान्तरण जुइत सुझाव बियादिसें माओवादीं थःगु पार्टीया दर्शन कथं मखसें लोकतान्त्रिक दर्शनया आधारय् राजनीतिक सहमति मालेत इनाप यानादिल ।
