अलपत्रय् लाःसा टिकट फ्रि !
येँ (सन्ध्या टाइम्स)/विदेशय् राजदूतावास पलिस्था यायेगु धइगु ला उगु देश व स्वदेशया स्वापू बांलाकेगु लागिं खः। तर कतारया नेपाली राजदूतावासया ज्या धाःसा थौंकन्हय् अलपत्रय् लाःपिं नेपाली श्रमिकतय् उद्धार यायेगु व न्ह्याथे यानाःसां ध्यबा उठे यानाः उमित नेपाः छ्वया हयेगुली हे सीमित जुयाच्वंगु दु। अझ थ्व ज्या यायां हे राजदूतया फुर्सद मदइगु तकं जुयाच्वंगु दु ।
कतारय् ज्या याये धकाः वइपिं नेपाली श्रमिकत म्यानपावर कम्पनीया ठगी व कतारया हे कम्पनीया बेइमानीं यानाः अलपत्र जुइगु घटनात अप्वः जू। अलपत्र जुइवं उपिं थःगु देश लिहां वनेत ला स्वइ तर विमानया टिकट न्यायेत धाःसा ध्यबा दइ मखु। छुं हे उपाय मंत कि उपिं नेपाली दूतावासय् वइ। तर दूतावासयाके नं उमित टिकट न्याना बीगु लागिं बजेट धाःसा दुगु मखु। पाहां खर्च धकाः दूतावासयात डेढ लाख तका बजेट फ्यानातःगु दु जब कि कतारय् ज्या याइपिं नेपाःमितय् ल्याः थ्व दांया पाय्छि निदुगं स्वंगू लाख दु। थ्व दां भाग तल धाःसा छम्ह श्रमिकयात छम्वः तका थइ। थ्व नं दां दूतावासय् अलपत्रय् लात धकाः वइपिं नेपाःमितय्त जा जक नकु नकुं हे फुइ। उकिं विमानया टिकट न्यायेगु लागिं दूतावासं अन हे च्वंपिं थीथी नेपाःमितय्त स्वापू तयाः ध्यबा मुंकेगु याइ। वंगु दँय् जक दूतावासं अज्याःपिं ४० म्ह नेपाःमियात थथे हे उखेंथुखें ध्यबा म्हयाः नेपाः छ्वया हःगु खः ।
नेपाःमितय्त अक्सर यानाः जुइगु थज्याःगु समस्या समाधानया लागिं आः अन च्वंपिं नेपाःमितय्सं हवाई टिकट जक न्यायेगु लागिं छगू कोष हे दयेकूगु दु। नेपाःमियात नेपाःमिं हे ग्वाहालि यायेगु धइगु भावनां उगु कोष दयेकूगु खःसा आः उकी छुं भचा ध्यबा नं खायेधुंकूगु दु। आः अलपत्रय् लाइपिं नेपाःमितय्त कम से कम नं नेपाः लिहां वयेगु लागिं टिकटया समस्या मजुइगु खँ धाःगु दु ।
