संसद घेरे यायेत सांसदलिसे सहलह
वैशाख १४ गते संविधानसभा घेराउ
येँ (सन्ध्या टाइम्स)/थ्वहे वइगु वैशाख १४ गते नेवाःतय्सं संविधानसभा घेरे यायेत्यंगु ज्याझ्वलय् ब्वति कायेगु लागिं म्हिगः थीथी पार्टीया नेवाः सभासद्तलिसे अन्तर्क्रिया जुल। नेवाः स्वायत्त राज्य मंकाः संघर्ष समितिया ग्वसालय् उगु ज्याझ्वः जूगु खः। ज्याझ्वलय् एनेकपा माओवादीया सभासद् हिसिला यमि, भिक्षु आनन्द, नेपाली कांग्रेसया सभासद तिर्थराम डंगोल, राम कृष्ण चित्रकार, नेकपा (एमाले) या सभासद् डा. मंगलसिद्धि मानन्धर, शिला कतिला आदिपिंसं न्ववासें वकुन्हुया ज्याझ्वलय् थःपिंसं सतकय् च्वनाः वा संविधानसभा दुने हे च्वनाः सः थ्वयेकेगु खँ कनादीगु खः ।
न्ह्यलुवा पद्मरत्न तुलाधरं संघीयता बारे मथूपिंत थुइकेगु ज्या नं यायेमाः धयादिल। संघर्ष समितिया मल्ल के. सुन्दरं १४ गतेया ज्याझ्वलय् नेवाः सभासद्तय्सं ग्वाहालि यायेमाःगु बिचाः प्वंकादिल। ज्याझ्वः संघर्ष समितिया न्हूम्ह नायः सुजिव वज्राचार्यया सभापतित्वय् जूगु खः ।
