नेवाः आन्दोलनय् देय् दबूया भूमिका
यल (सन्ध्या टाइम्स)/ललितपुर नागरिक अभियान व कवि क्याफेया ग्वसालय् नेवाः राज्य व नेवाः देय् दबू विषयय् अन्तर्क्रिया ज्याझ्वः जुल। ज्याझ्वलय् नेवाः देय् दबूया नायः नरेश ताम्राकार व पुलांम्ह नायः मल्ल के सुन्दरं बिचाः तयादीगु खः ।
नायः नरेश ताम्राकारं नेवाः देय् दबूया स्थापनाय् यक्व नेवाःतय्गु हिचःति लानाच्वंगु दुगुलिं आः उकिं उमिगु योगदानयात कदर यासें गनं द्वंकेगु ज्या याये फइ मखु धयादिल। वय्कलं आः थ्व नेवाः राज्य स्थापनाया निंतिं थःगु दक्व स्रोत साधन छ्यलाः नं दक्वलिसे सहकार्य याना वनाच्वनीगु बचं बियादिल। उकिया निंतिं वय्कलं दबूयात फुफुगु ग्वाहालिया निंतिं इनाप नं यानादिल ।
अथेहे पुलांम्ह नायः मल्ल के. सुन्दरं आःतक नेवाः देय् दबुलिं यानाच्वंगु ज्याय् सन्तुष्टि प्वंकुसें नेवाः राज्य स्थापनाया ज्याय् साथ बिउपिं ब्यक्ति व संस्थातय्त सुभाय् द्यछानादिल। थ्व विषयय् राजनीतिक पार्टीत खने दयेक वा खने मदयेक अस्पष्ट जुयाच्वंगुलिं ब्यापक जनदवाव मदयेकं जातीय पहिचान सहितया संघीय ब्यवस्था मवइगु खँय् नं वय्कलं बः बियादिल ।
थौ अप्वः मनूत राज्यया सिमांकन व नामांकनय् जक तक्यनाच्वंगु तर आः व राज्यतय्त दइगु अधिकार बारे झं चर्चा व सहलह जुइमाःगु खँ नं वय्कलं कनादिल। ज्याझ्वलय् सहभागीपिनि न्ह्यसःया लिसः नं बिउगु खः ।
