कवितय्त संविधान मवइगु खँ न्यंकाहल खनालं
येँ (सन्ध्या टाइम्स)/इलय् हे संविधान जारी यायेमाः धकाः कविता न्यंकः वंपिं कवितय्त एमाले अध्यक्ष झलनाथ खनालं आः इलय् संविधान जारी याये फइ मखु धकाः तप्यंक धयाहःगु दु ।
पारिजात स्मृति मंचपाखें म्हिगः सुथय् वय्कःया छेँय् कविता न्यंकेत छपुचः कवित वंगु खः। उगु इलय् कवितलिसे खँ ल्हासें एमाले अध्यक्ष झलनाथ खनालं आः नं संविधान वइ तिनि धकाः जनतायात झंगः खँ ल्हानाच्वनागु पाय्छि मखु, संविधान जेठ १४ गते वइ मखु धकाः तप्यंक धयादीगु खः।
संविधानसभाया प्रक्रियाया ल्याखं नं आः जेठ १४ गते संविधान वयेफइगु सम्भावना मदुगु खँ नं वय्कलं स्पष्ट यानादिल ।
कवितय्सं म्हीग माओवादी अध्यक्ष प्रचण्डया छेँय् कविता न्यंकः वंगु खःसा कांग्रेसया नेतातय्सं धाःसा अझं ई मबिउनि धाःगु दु ।
