आन्दोलन पाखें हे सरकार क्वःथलेगु माओवादी निर्णय
स्वद्वं जक लाडकु समायोजन यायेगु खँ वाइह्यात : प्रचण्ड
एकीकृत नेकपा (माओवादीं) वर्तमान सरकारयात सतक आन्दोलन मार्फत हे क्वःथलेगु निर्णय याःगु दु । माओवादीया पोलिटब्यूरो बैठकं सरकार पूर्ण रुपं असफल जुइधुंकूगुलिं सरकार विघटन यानाः न्हूगु राष्ट्रिय सहमतिया सरकार गठन यायेगुया विकल्प मदुगु निर्णय याःगु खः ।
बैठकय् माओवादीं वर्तमान सरकार विघटन मजुतल्ले संविधानसभाया म्याद मतेनेगु नं निर्णय याःगु खः । इलय् हे संविधान निर्माण मजुइगु धकाः कांग्रेस व एमाले नेतातय्सं सार्वजनिक रुपं धयाच्वंगु इलय् माओवादीं उकीया निंतिं सरकार परिवर्तनया सर्त न्ह्यने हःगु खः ।
बैठकं चैत २४ गते याःगु जनप्रदर्शनं सतकं हे सरकार परिवर्तनया निंतिं दबाव बीफइगु प्रष्ट जूगु धासें वैशाष ९ गते निसें सकत संघर्ष यायेगु ज्याझ्वः सार्वजनिक याःगु दु । वैशाष ९ गते लेनिन दिवसया झ्वलय् देय्न्यंक राज्यस्तरय् सभा यायेगु व वैशाष १८ गते मे दिवसया झ्वलय् येँय् विशाल जनप्रदर्शन यायेगु निर्णय याःगु दु ।
बैठक लिपाः पार्टीया निर्णय सार्वजनिक यायेत ग्वसाःग्वःगु पत्रकार सम्मेलनय् पार्टी अध्यक्ष पुष्पकमल दाहाल 'प्रचण्डं' संसदय् अविश्वासया प्रस्ताव यंकूसाः हानं गणितीय आधारय् सरकार क्वःथलेगु न्हापाया थें बहुमत खाकेगु फोहरी कासा जुइगुलिं अविश्वासया प्रस्ताव सम्बन्धी सहलह 'क्लोज' यायेगु निर्णय जूगु कनादिल ।
अथेहे अध्यक्ष प्रचण्डं सेना समायोजन विशेष समितिं स्वद्वं जक माओवादी लडाकुयात नेपाली सेनाय् समायोजन यायेगु निर्णय याःगु खँयात वाइह्यात जूगु टिप्पणी यानादिल । वय्कलं थ्व वाइह्यात खँ जूगु धयादिसें माओवादी विना सेना समायोजन यानाः क्यनेत हाथ्या नं बियादिल ।
