स्वद्वं लाडाकु जक समायोजन यायेगु सहमित
एकीकृत नेकपा (माओवादी) बाहेकया दलं स्वद्वं जक लडाकुयात नेपाली सेनाय् समायोजन यायेगु सहमति प्वंकूगु दु ।
शुक्रवाः थीथी राजनीतिक दलया शीर्ष नेतात सहित च्वंगु सेना समायोजन विषेश समितिया बैठकय् माओवादीया स्वद्वं लडाकु वा छपू ल्वाभः छम्ह लडाकुया आधारय् नेपाली सेनाय् समायोजन यायेगु सहमति प्वंकूगु खः ।
बैठकय् विषेश समितिया संयोजकया हैसियतं प्रधानमन्त्री माधवकुमार नेपालं स्वद्वं लडाकु वा छपू ल्वाभः छम्ह लडाकुया आधारय् समायोजन यायेफइगु प्रस्ताव तयादीगु खः । उकीया बारे बैठकय् उपस्थित नेतातय्सं सहमति प्वंकूसां निर्णय धाःसा मया । एमाले अध्यक्ष झलनाथ खनालं बैठकय् माओवादी अध्यक्ष उपस्थित मजूगुलिं प्रधानमन्त्रीया प्रस्तावय् सहमति जुसां छुं निर्णय मयाःगु कनादिल ।
विषेश समितिं संविधानसभाय् दुथ्याःगु खुगू प्रमुख दलया शीर्ष नेतातय्त बैठकय् सःतुगु खःसां माओवादी अध्यक्ष पुष्पकमल दाहाल 'प्रचण्ड' पार्टीया पोलिटब्यूरो बैठक जुयाच्वंगुलिं उपस्थित जुयामदी । अथेहे समितिलय् माओवादी पाखें दुजः जूपिं जनार्दन शर्मा 'प्रभाकर' व वर्षमान पुन 'अनन्त' नं बैठकय् उपस्थित जुयामदी ।
बैठकय् कांग्रेस कार्यवहाक सभापति सुशील कोइराला, एमाले अध्यक्ष झलनाथ खनाल, मधेसी जनअधिकार फोरमया अध्यक्ष उपेन्द्र यादव, तराई मधेश लोकतान्त्रिक पार्टीया अध्यक्ष महन्थ ठाकुर लगायतया उपस्थिति दुगु खः ।
