कांग्रेसाया सर्त संविधान निर्माण यायेमबीगु षड्यन्त्र : माओवादी
एकीकृत नेकपा (माओवादीं) कांग्रेसं राष्ट्रिय सहमतिया सरकार गठनया निंतिं तःगु प्यंगू बुँदे सर्त संविधान निर्माण यायेमबीगु षड्यन्त्र जूगु द्वपं ब्यूगु दु ।
बिहीवाः पार्टीया मू ज्याकू पेरिस डाँडाय् च्वंगु पोलिटब्युरोया बैठकय् कांग्रेसं माओवादी लडाकु व ल्वाभः व्यवस्थापन, कब्जा यानातःगु छेँबुँ लितबीगु, वाईसिएलया रुपान्तरण व माओवादीं हिंसा त्वःतुगु बल्लागु आधार क्यंनेफुसाः राष्ट्रिय सरकारया बारे सहलह यायेफइगु धकाः तःगु सर्त संविधान निर्माण यायेमबीगु षड्यन्त्र जूगु निष्कर्ष पिकाःगु दु ।
बैठक लिपाः पत्रकारत नाप खँल्हाबंला यानादिसें माओवादी प्रवक्ता दिनानाथ शर्मां कांग्रेसं तःगु सर्त छगू नं संविधान निर्माण सम्बन्धि मजूगुलिं थ्व संविधान निर्माण यायेमबीगु षड्यन्त्र कथं वःगु सर्त जूगु दावी यानादिल । वय्कलं कांग्रेस धाथें हे संविधान निर्माण यायेत इमान्दार खःसा शासकीय स्वरुप, राज्य पुनर्संरचना आदिया बारे सर्त तयेत हाथ्या बियादिल ।
अथेहे बैठकय् न्ववानादिसें पार्टी अध्यक्ष पुष्पकमल दाहाल 'प्रचण्डं' मेमेगू दलया नेतातय्सं जेठ १४ दुने संविधान निर्माण मजुइगु खँ धयाच्वंसां थःपिं इलय् हे संविधान निर्माण यायेत लगे जुइमाःगु धयादिल ।
बैठकय् शान्ति व संविधान निर्माणया निंतिं दबाव बीगु आन्दोलनया प्रभावकारी दयेकेगु विषयलय् सहलह जूगु खः । नापं बैठकय् पार्टीया भावी योजनाया बारे नं सहलह जूगु खः ।
