एमाले सभासद्तय्सं संविधानसभाया ई तनेत सुझाव
निर्धारित इलय् हे संविधान निर्माण यायेमफइगु धासें नेकपा (एमाले)या सभासद्तय्सं संविधानसभाया ई तनेत सुझाव ब्यूगु दु ।
सिंहदरवार स्थित पुलांगु प्रतिनिधि सभा भवनय् बिहीवाः च्वंगु एमाले संसदीय दलया बैठकय् न्ववाःपिं सभासद्तय्सं जेठ १४य् संविधान निर्माण जुइफइगु वातारवरण मदुगु धासें संविधानसभाया म्याद खुलाः थप यायेमाःगु सुझाव ब्यूगु खः ।
अथेहे बैठकय् अधिकांश संस्थापन पक्षया सभासद्तय्सं वर्तमान सरकारं अपेक्षित रुपं ज्या यायेमफुगु धासें राष्ट्रिय सहमतिया निंतिं प्रधानमन्त्रीं राजीनामा बियाः सहमतिया लँपू चायेकेमाःगु खँ धाःगु खःसा सरकार पक्षया सभासद्तय्सं बांलागु विकल्प बिना सरकार विघटन यायेमज्यूगु तर्क प्वंकूगु खः ।
सभासद्तय्सं संविधान निर्माणया निंतिं आवश्यक जुसाः संविधान संशोधन यानाः बहुमतीय प्रणालीया पलेसाः सहमतिय प्रणालीलय् वनेमाःगु बिचाः प्वंकूगु दु । उमिसं संविधानय् न्ह्यथंनातःगु सहमतिय प्रणालीयात संशोधन यानाः बहुमतीय प्रणालीलय् वनेगु ज्या गम्भीर त्रुटी जूगु धासें हानं सहमतिय प्रणालीलय् वनेमाःगु बिचाः प्वंकूगु खः ।
बिहीवाःया बैठकय् झिंन्हय्म्ह सभासद्तय्सं थःथःगु बिचाः प्वंकूगु दु । थ्वस्वयां न्ह्यः नीगुम्ह सभासद्तय्सं थःथःगु बिचाः प्वंकूगु खः । बैठकय् सभासद्तय्सं न्ववायेगु ज्या मसिधःगुलिं शुक्रवाः हानं संसदीय दलया बैठक च्वनीगु जूगु दु ।
