कांग्रेस बैठक पिने कार्यकर्ताया धर्ना
येँ (सन्ध्या टाइम्स)/नेपाली कांग्रेसया केन्द्रीय ज्याकू सानेपाय् थौं सुथंनिसें जुयाच्वंगु केन्द्रीय बैठकया पिनेसं कार्यकर्तातय्सं प्रदर्शन याःगु दु। कांग्रेसया रामेछाप जिल्ला समितिया कार्यकर्तातय्सं उगु प्रदर्शन यानाच्वंगु खः ।
रामेछापया जिल्ला सभापति रामचन्द्र खड्कायात चीकेमाःगु माग यासें कार्यकर्तां थ्व प्रदर्शन याःगु खः। कार्यकर्तातय् थ्व प्रदर्शनं यानाः केन्द्रीय कमिटीया बैठक तकं असहज जूवंगु खँ धाःगु दु। कांग्रेसया महाधिवेशन तयारी यायेगु बारे सहलह ब्याकेत थौं केन्द्रीय कमिटीया बैठक च्वंगु खः। बैठकय् पार्टीया गां, इलाका, नगर, जिल्ला व क्षेत्रया अधिवेशन याना वनेगु बारे सहलह जुइ धाःगु दु ।
कांग्रेसया थ्व सिबें न्ह्यः च्वंगु केन्द्रीय कमिटीया बैठकं थ्वहे वइगु भदौ १० गतेनिसें १४ गते तक येँय् पार्टीया महाधिवेशन सःतेगु निर्णय यायेधुंकूगु दु। गिरिजाप्रसाद कोइराला दत्तले महाधिवेशनया तिथि क्वःछीगु ज्याय् हे समस्या वयाच्वंगु खः ।
थौंया बैठकं बैशाख महिनाया दुने पार्टीया सदस्यता नवीकरण याये माःगु, न्हूगु सदस्यता बीगु ज्या क्वचायेके माःगु विषययात कयाः सहलह जुइ धाःगु दु। थौंया बैठकय् समसामयिक राजनीति, न्हूगु संविधान निर्माण, सरकारया ज्या, राष्ट्रिय सहमति, उच्चस्तरीय राजनीतिक संयन्त्र नापं कांग्रेसं माओवादीयात तःगु प्यंगू बुँदाया प्रस्ताव लगायतया थीथी सवालय् सहलह जुइ धाःगु दु ।
