पीच याकेत सतक जाम
येँ (सन्ध्या टाइम्स)/पर्साया सदरमुकाम वीरगन्जंनिसें १५ किलोमिटर ताःहाकःगु पोखरिया तकया लँय् पीच यायेमाःगु माग यासें थौं सुथंनिसें हे स्थानी जनतां प्रदर्शन याःगु दु। उगु प्रदर्शनय् हस्तक्षेप यानाः प्रहरीं स्वम्हेसित ज्वना यंकूगु दुसा इमित त्वःतेमाःगु माग यासे आः प्रदर्शनकारीतय्सं अनया प्रहरी ज्याकू घेराउ याःगु दु ।
प्रदर्शनया झ्वलय् प्रहरीं विकास निर्माण समन्वय समिति पर्साया कजि बद्री चौरसिया, पोखरिया गाविसया पुलांम्ह न्वकु गोबर्द्धन यादव व अब्दुल रहिम मियाँयात ज्वना यंकेवं गांयापिं फुक्कं वनाः प्रहरी ज्याकू घेराउ याःगु खः। इमिसं पीच नं यायेमाःगु नापं ज्वना यंकूपिंत तत्काल त्वःतेमाःगु माग यानाच्वंगु दु। थौं सुथंनिसें हे स्थानीय मनूतय्सं प्रदर्शन यानाच्वंगुलिं अन यातायात ठप्प जूगु दु ।
वंगु चैत्र २४ गते नं सतक पीच यायेमाःगु माग यासें गांयापिंसं चक्का जाम याःगु खः । अबलय् प्रहरी निरीक्षक गुरुविष्णु काफ्लें पीच यायेगु निंतिं सम्बन्धित थासय् पहल यायेगु आश्वासन बीवं आन्दोलन स्थगित याःगु खः ।
