'सत्ता राजनीति व माओवादी लडाकु व्यवस्थापन बाधक'
संविधानसभाया अध्यक्ष सुवासचन्द्र नेम्वाङं इलय् हे संविधान जारी यायेत सत्ता राजनीतिक व माओवादी लडाकु व्यवस्थापन आःया प्रमुख बाधक जूगु खँ धयादीगु दु । वय्कलं संविधानसभाय् उपस्थित राजनीतिक पार्टी दथुइ एकता कायम जुसाः अझ नं घोषित मितिया दुने हे संविधान जारी जुइफइगु धयादिल ।
आदिवासी जनजाति महासंघं बिहीवाः इलय् हे संविधान निर्माण यायेत लःल्हाःगु ज्ञापनपौ कयादिसें नेम्वाङं संविधान निर्माण यायेत आः पीनिन्हु जक ल्यं दनीगु जुसां निर्धारित कार्यतालिकायात व्यवस्थापन यानाः जनभावना कथं संविधान जारी यायेफइगु स्थिति दुगु धयादिल । वय्कलं संविधान निर्माण यानाः देय्यात राजनीतिक निकास बीत व दिगो शान्ति सहितया स्थायित्व प्रदान यायेत दक्वं ख्यया दबाव आवश्यक जूगु धयादिल ।
महासंघया अध्यक्ष राजकुमार लेखीया नेतृत्वय् वंगु प्रतिनिधिमण्डलं आदिवासी जनजातिया मंकाः सवालयात सम्बोधन यायेगु, जातीय पहिचान सहितया स्वायत्त व आत्मनिर्णयया अधिकार प्रदान यायेगु व धर्मनिरपेक्ष राज्यया सुनिश्चिताया साथ निर्धारित इलय् हे संविधान जारी याये माःगु माग सहितया ज्ञापनपौ लःल्हाःगु खः । उगु हे झ्वलय् प्रतिनिधिमण्डलं इलय् हे संविधान निर्माण यायेत दबाव बीगु कथं स्वंगू फिट ताःहाकःगु पँया कलम नं लःल्हाःगु खः ।
