न्हूम्ह अमेरिकी राजदूत नेपाः थ्यंकवल
नेपाःया निंतिं न्हूम्ह अमेरिकी राजदूत स्कट एच. डिलिसी बिहीवाः येँय् थ्यंकादीगु दु । अमेरिकी परराष्ट्र सेवाया पेशागत दुजः डिलिसी येँय् थ्यनेवं वय्कलं थःगु कार्यकालय् नेपाः व अमेरिका दथुइया मित्रता विकाश यायेगु प्रतिकृया बियादिल ।
त्रिभुवन अन्तर्राष्टिय विमानस्थलय् पत्रकारत नाप खँल्हाबंला यानादिसें वय्कलं नेपाः वयेखना: थः तसकं लय्ताःगु धयादिसें निगू देय् दथुइया ताः ई न्ह्यः निसेंया द्विपक्षीय मित्रताया विकास यायेगु व निगू देय्या जनता दथुइ सौहार्दपूर्ण स्वापूयात बल्लाकेगु विश्वास प्वंकादिल ।
राजदूत डिलिसीयात अमेरिकी राष्ट्रपति बाराक ओबमां सन् २००९या नोभेम्बरय् नेपाःया राजदूत कथं मनोनित याःगु खःसा सिनेटं सन् २०१० मार्चय् उगु मनोनयनयात स्वीकृति ब्यगु खः । न्हूम्ह राजदूत डिलिसीं वइगु आइतवाः राष्ट्रपति डा. रामवरण यादव समक्ष थःगु ओहदाया प्रमाण पत्र लःल्हाये धुंकाः जक थःगु ज्या शुरु यानादी ।
नीच्यादँ कूटनीतिक ज्या यायेधुंकूम्ह डिलिसीं थ्वस्वयां न्ह्यः एरिटियाया निंतिं राजदूत व बोत्स्वानाया अमेरिकी दूतावासय् डेप्युटी चीफ अफ मिसनया पदय् च्वनाः ज्या यायेधुकूगु दु ।
