जेठ १४य् संविधान जारी जुइमखु : खनाल
नेकपा (एमाले)या अध्यक्ष झलनाथ खनालं जेठ १४ दुने न्हूगु संविधान जारी जुइमफइगु खँ धयादीगु दु ।
बिहीवाः पारिजात स्मृति केन्द्रं वय्कया निवासय् कविता वाचन यायेधुंकाः वय्कलं जेठ १४य् संविधान घोषणा जुइगु उपयुक्त वातावरण मदुगु धयादिल । संविधान निर्माण प्रक्रिया व उकीया अन्तरवस्तुया कारणं क्वःछीनातःगु इय् संविधान निर्माण मजुइगु वय्कलं दावी यानादीगु खः ।
वय्कलं आः नं नेतातय्सं जेठ १४य् हे संविधान जारी जुइ धकाः धयाच्वंगु धयादिसें, 'आः जनतायात झंग ल्हायेमखु, जेठ १४ गते संविधान बीफइगु अवस्था विद्यमान मदु ।'
न्हूगु ढंगं न्ह्याः वनाः दलत दथुइ सहमति कायम यायेमाःगु धयादिसें अध्यक्ष खनालं विद्यमान परिस्थितिं शिक्षा कासें दक्वं राजनीतिक पार्टीत सहमति पाखे न्ह्याः वनीगु विश्वास प्वंकादिल । वय्कलं निकट भविष्यय् हे राष्ट्रिय सहमति निर्माण जुइगु दावी नं यानादिल ।
संविधान निर्माण, राजनीतिक सहमति व शान्तिया निंतिं पारिजात स्मृति केन्द्रया दुजःतय्सं वय्कया छेँय् कविता वाचन याःगु खः ।
