सर्सत सरकरया विकल्प मालेत कांग्रेस तयार
नेपाली कांग्रेसं थःपिनिगु प्यंगू माग एनेकपा (माओवादीं) पूवंकुसाः थःपिं थ्व सरकारया विकल्प कथं राष्ट्रिय सहमतिया सरकार दयेकेत तयार जूगु खँ धाःगु दु ।
विक्रम संवत २०६७ न्हुदँया लसताय् कांग्रेस उपसभापति नापं संसदीय दलया नेता रामचन्द्र पौडेलं थःगु हे छेँय् ग्वसाःग्वयादीगु तुच्चा ज्याझ्वलय् कांग्रेसया स्वम्ह शीर्ष नेतातय्सं राष्ट्रिय सहमतिया सरकारया निंतिं विश्वासया वातावरण दयेकेत माओवादीयात इनाप याःगु दु ।
कांग्रेस वरिष्ठ नेता शेरबहादुर देउवां माओवादी लडाकु व ल्वाभः व्यवस्थापन, कब्जा यानातःगु छेँबुँ लितबीगु, वाईसिएलया रुपान्तरण व माओवादीं हिंसा त्वःतुगु बल्लागु आधार क्यंनेफुसाः प्रधानमन्त्री माधवकुमार नेपालयात थःम्हं हे राजीनामा बीत इनाप यायेगु कनादिल ।
नेता पौडेलं माओवादीं अविश्वासया वातावरण चीकेत ठोस कार्ययोजना ह:सा सहमति, सहकार्य व एकतायाया लँपू चालीगु धयादिसें वधुंकाः जक राष्ट्रिय सहमतिया सरकार सम्बन्धय् सहलह यायेफइगु कनादिल ।
कांग्रेस कार्यवहाक सभापति सुशील कोइरालां माओवादी लडाकुया समायोजन व पुनस्थापना बिनाः शान्ति प्रकृया पूवनेमफइगु धयादिसें माओवादीं ग्वाहालि मयागुलिं हे शान्ति प्रकृया न्ह्यने वनेमफुगु धयादिल । वय्कलं शान्ति प्रकृयायात निष्कर्षय् थ्यंकाः जक संविधान निर्माण जुइगुलिं शान्ति प्रकृयायात पूवंकेत माओवादीयात जिम्मेवार जुइत इनाप यानादिल ।
