किपुली नेवाः राज्यपाखें 'सवारी कर'
वैशाख १४ गते संविधानसभा घेराउ
येँ (सन्ध्या टाइम्स)/नेवाः स्वायत्त राज्य मंकाः परिषद् किपूपाखें नेवाः स्वायत्त राज्यया अनुभूति जुइ कथं ज्या याना वनेत नापं नेवाः स्वायत्त राज्य सुनिश्चित यायेगु आन्दोलनयात न्ह्याकेत थनिंनिसें किपुली दुहां वइगु फुक्क सवारी साधनय् 'सवारी कर' काइगु जूगु दु ।
किपू नगरपालिकां सवारी प्रवेश कर कयाच्वंगु लागा त्रिभूवन विश्वविद्यालयया गेटय् हे नेवाः स्वायत्त राज्यया ध्वाँय् सहित मंकाः परिषद्या ब्यानर तयाः थ्व सवारी प्रवेश कर कायेगु ज्या न्ह्याकूगु खः ।
थौं सुथय् ६ बजेनिसें हे मंकाः परिषद्या दुजःत च्वनाः अथे कर कायेगु शुरु याःगु खः। परिषदं आःयात प्रत्येक सवारी साधनय् झितका दां ग्वाहालि कथं धकाः कर म्हयेगु शुरु याःगु खः। ध्यबा कयाच्वंगु दु ।
आःया नितिं बैशाख १४ गते जुइगु संविधानसभा घेराउ ज्याझ्वःया नितिं धकाः परिषदया कार्यकर्तातय्सं ग्वाहालि पौ बियाः अथे कर काःगु खःसा लिपा वनाः उकियात सवारी प्रवेश करया रुपय् हिलाः नेवाः स्वायत्त राज्यया अनुभूति जुइ कथं नियमित रुपं हे कया छ्वयेगु खँ धाःगु दु। पिने जिल्लाय् नं थीथी जातीय पुचःतय्सं अथे कर कायेगु यानाच्वंगु दु ।
पांगाय् सांस्कृतिक सभा
बैशाख १४ गते संविधानसभा घेराउ ज्याझ्वः ताः लाकेगु निंतिं कन्हय् सनिलय् पांगाय् नेवाः सांस्कृतिक सभा याइगु जूगु दु ।
घेराउ ज्याझ्वःयात ताःलाकेत आह्वान यासें कन्हय् सनिलय् थ्व सभा यायेत्यंगु खः। उगु सभाय् नेवाः सांस्कृतिक ब्वज्या नापं किपूया नेवाः आन्दोलनया न्ह्यलुवातय्सं न्ववानादीगु ज्याझ्वः दु। नेवाः स्वायत्त राज्य मंकाः परिषद् किपूपाखें किपू नगर दुने थीथी इलय् कोणसभानिसें सांस्कृतिक सभा तकं यायेगु जुइ धाःगु दु ।
