ठेक्का मलायेवं सुद नेतातय् छेँय्
येँ (सन्ध्या टाइम्स)/भारतय् छापे यायेगु ठेक्का बीगु धकाः तयारी जुइधुंकूगु मेशिन रिडेबल पासपोर्ट अन्तिमय् वयाः भारतय् छापे याकेगु मखु धकाः सरकारं याःगु निर्णययात कयाः नेपाःया निंतिं भारतीय राजदूत राकेश सूदं नेपाःया थीथी नेतातय्त नापलायेगु शुरु यानादीगु दु। वय्कलं म्हिगः प्रधानमन्त्री माधव नेपालयात नापलानादीगु खःसा थौं वय्कलं प्रमुख प्रतिपक्षी पार्टी माओवादीया अध्यक्ष प्रचण्डयात नापलानादीगु दु ।
थौं सुथय् अध्यक्ष प्रचण्डयात नापलायेगु झ्वलय् वय्कलं भारतय् एमआरपी छापे यायेगु लागिं तयारी समेत जुइधुंकूगु अवस्थाय् नेपालं निर्णय लित काःगु पाय्छि मजुल धकाः असन्तुष्टि प्वंकादीगु खः ।
उगु इलय् अध्यक्ष प्रचण्डं छपाई सम्बन्धी ठेक्का न्ह्याम्हेसित बिउसां जिउ तर भारतं थ्व ज्याया लागिं सरकारयात दवाव हे बियाः व अझ दूतावासपाखें पौ हे च्वयाः ठेक्का लाकेत स्वःगुलिं थःपिंसं उकिया विरोध यानागु खः धकाः ध्वाथुइकादीगु खः ।
राजदूत सुदं थःपिंसं परराष्ट्र मन्त्रालययात च्वयागु गोप्य पौ पत्रिकाय् सार्वजनिक जूगु खँय् नं आपत्ति प्वंकादीगु खः। दूतावासं सुरक्षा चिउताःया कारणं उगु ज्या भारतयात बीमाः धकाः पौ च्वःगु खः ।
