व्यापार द्यापं म्हो यायेत वाणिज्य काउन्सिलर तइगु
येँ (सन्ध्या टाइम्स)/सरकारं वैदेशिक व्यापारय् जुयाच्वंगु द्यापं म्हो यायेत विशेष कथं पहल न्ह्याकीगु जूगु दु। थुकिया निंतिं सरकारं थीथी देशय्च्वंगु नेपाःया कूटनीतिक नियोग व वाणिज्य दूतावासयात अझ सक्रिय याइगु जूगु दु ।
सरकारं झण्डै झिंनिगू स्वयां अप्वः देय्या कूटनीतिक नियोगय् अनुभवी कमर्सियल काउन्सिलर छ्वयेगु नापं बहुपक्षीय, क्षेत्रीय व द्विपक्षीय स्तरय् व्यापार अप्वयकेगु नीतियात नं अख्तियार याइगु जूगु दु ।
थ्व झ्वलय् सरकारं चालू आर्थिक दँया न्हापांगु न्हय्लाया दुने कूल वस्तु व्यापार द्यापं ५९ दशमलव ९ प्रतिशतं थहां वंगु न्ह्यथंगु दु ।
वाणिज्य मन्त्रालयया कथं आः तत्कालया निंतिं दकलय् अप्वः नेपाली ज्वलंत निर्यातया सम्भाना दुगु अमेरिकाया वाशिंगटन, भारतया न्हू दिल्ली व कोलकात्ता, बेल्जियमया ब्रसेल्स, स्वीट्रल्याण्डया जेनेभा, जापानया टोकियो, चीनया बेइजिङ्ग व हङकङ, कतारया दोहा व थाइल्यण्डाया बैंकक लगायतया देशय् कमर्सियल काउन्सिलरत छ्वयेगु तयारी याःगु दु ।
मन्त्रालयं बिउगु जानकारी कथं अमेरिकाया वाशिंगटनय् दकलय् अप्वः निर्यातया सम्भावना दुगु कारणं अनया दूतावासय् अनभवी व विज्ञ सहसचिव व उवसचिवयात वाणिज्य काउन्सिलरया रुपय् छ्वयेत्यंगु दु ।
