पासपोर्टया कारण पिहां वनीपिं म्हो
येँ (सन्ध्या टाइम्स)/वैदेशिक रोजगारया निंतिं पिहां वनीपिं नेपाःमितय् ल्याः झण्डै ४० प्रतिशतं कुहां वःगु दु ।
विदेशय् ज्या याः वनीपिं नेपाःमितय् ल्याः कुहां वःगु कारण मेता मखसे पासपोर्ट जूगु धापू सम्बन्धित व्यवसायीतय् दु। न्हापा जिल्लापाखें वितरण याना वयाच्वंगु पासपोर्ट बन्द जुइवं थुकिया प्रभाव वैदेशिक रोजगारय् वनीपिं नेपाःमितय्त लाःगु खः ।
वैदेशिक रोजगारया निंतिं आपालं देश माग याना वयाच्वंगु दुसां पासपोर्टया हे कारणं म्यानपावर एजेन्सी धाःसा निवेदन तः वःपिनिगु ल्याः न्हापा स्वयां गाक्कं कुहां वयाच्वंगु व्यवसायीतय्सं धाःगु दु ।
व्यवसायीतय् कथं न्हिं न्यासः निसें न्हय्सःया ल्याखय् वैदेशिक रोजगारया निंतिं पिहां वनीपिं दयाच्वंगु खःसा आः वयाः पासपोर्टया वयाच्वंगु विवादया कारणं थ्व ल्याः कुहां वयाच्वंगु खः ।
