माओवादी गतिविधि प्रति भारत असन्तुष्ट
प्रमुख प्रतिपक्षी दल एकीकृत नेकपा (माओवादीं) थःगु देय् विरोधी गतिविधि याःगु धासें भारतं च्यूताः प्वंकूगु दु । भारतीय राजदूत राकेश सुदं बुधवाः माओवादी अध्यक्ष पुष्पकमल दाहाल 'प्रचण्ड'यात नापलनाः भारत विरोधी गतिविधि याःगु धासें असन्तुष्टि प्वंकादीगु दु ।
खँल्हाबंलाय् राजदूत सुदं सरकारं मेसिन रिडेवल पासपोर्ट (एमआरपी) भारतय् छापे याकेबीगु निर्णयया माओवादीं विरोध याःगु धासें असन्तुष्टि प्वंकादीगु खः । सुदं माओवादीं उगु खँय् राजनीति यायेत स्वःगु धयादीगु खः ।
लिस:लय् माओवादी अध्यक्ष प्रचण्डं प्रक्रिया पूमवंकुसें याःगु निर्णयया विरोध यानाःगु धयादिसें माओवादीं भारत विरोधी गतिविधि याःगु मखसें न्हूगु परिस्थितिलय् न्हूगु सम्बन्ध कायम यायेत स्वःगु धयादिल ।
भारतीय राजदूतावासं थ्वस्वयां न्ह्यः हे सरकारं एमआरपी भारतय् छापे याकेगु निर्णय रद्द याःगु खँया बारे प्रधानमन्त्री माधवकुमार नापलानाः उगु निर्णय प्रति आपत्ति प्वंकादीगु खः । नापं दूतावासं उगु प्रकरणय् राजनीतिकरण जूगु व दूतावासं छ्वंगु गोप्य पौ सार्वजनिक याःगु धासें खेद व्यक्त याःगु खः ।
