विक्रम संवत २०६७ न्हुदँ सुरु
थनिनिसें विक्रम संवतया न्हुदँ २०६७ सुरु जूगु दु । न्हुदँया लसताय् थौं सरकारं सार्वजनिक बिदा बियातःगु दु । न्हुदँया लसताय् राष्ट्रपति व प्रधानमन्त्री लगायतं भिंतुना बियादीगु दु । अथेहे थीथी राजनीति दलया नेतातय्सं २०६७ सालय् शान्ति प्रकृयायात निष्कर्षय् थ्यंकेगु व अग्रगामी संविधान दयेकेगु प्रतिबद्धता प्वंकूगु दु ।
राष्ट्रपति डा. रामवरण यादवं संवादया माध्यमं जक देय्या समस्या व हाथ्या समाधान यायेफइगुलिं दलतय्त जिम्मेवार जुइत इनाप यानादिल । न्हुदँया लसताय् भिंतुना सन्देश बियादिसें राष्ट्रपति यादवं इलय् हे संविधान जारी यायेफुसाः जक लोकतान्त्रिक गणतन्त्रयात संस्थागत यानाः न्ह्याः वनेफइगु धयादिसें दलतय् जिम्मेवार जुइत इनाप यानादिल ।
राष्ट्रिय एकता व आपसी मेलमेलाप थौंया देय्या आवश्यकता जूगु खँ नं वय्कलं न्ह्यथंनादीगु दु । अथेहे उपराष्ट्रपति परमानन्द झां न्हुदँया लसताय् दक्वं देशवासीया सुख, शान्ति, समृद्धि व सफलताया कामना यानादीगु दु ।
प्रधानमन्त्री माधवकुमार नेपालं नं छगू भिंतुना सन्देश बियादिसें आपसी हठ व संकिर्ण स्वार्थं च्वये दनाः खुला खुलस्त सहलहया निंतिं दलतय्त आह्वान यानादिल । वय्कलं दक्वं कथंया अतिवादयात परास्त यानाः हे शान्ति, लोकतन्त्र व अग्रगमनयात सुनिश्चित यायेफइ धयादिसें शान्ति व संविधानया निंतिं सहमतिलय् वयेत दलतय्त इनाप यानादिल ।
माओवादी अध्यक्ष पुष्पकमल दाहाल 'प्रचण्ड' व महासचिव रामबहादुर थापा 'बादलं' मंकाः विज्ञप्ति पिथनाः न्हूगु दँय् राष्ट्रिय स्वाधीनताया रक्षा यासें सेना समायोजन सहितया वास्तविक शान्ति व जनपक्षीय संविधानया सुनिश्चितताया कामना यानादीगु दु ।
कांग्रेस वरिष्ठ नेता नापं पुलाम्ह प्रधानमन्त्री शेरबहादुर देउवां इलय् हे न्हूगु संविधान जारी यायेत दक्वं जिम्मेवार पक्षत छप्पं जुयाः न्ह्याः वनेमाःगु धयादिल । अथेहे कांग्रेस कार्यवाहक सभापति सुशील कोइराला व संसदीय दलया नेता रामचन्द्र पौडेलं नं न्हुदँया लसताय् भिंतुना सन्देश बियादिसें न्हूगु संविधान जारी यानाः शान्ति व लोकतन्त्रयात साकार यायेत दक्वं पक्षयात न्हूगु दँ पाखें प्ररेणा बीमाः धकाः कामना यानादीगु दु ।
एमाले अध्यक्ष झलनाथ खनालं शान्ति प्रकृयायात निष्कर्षय् थ्यंकेगु, जनक्रान्तिया उपलब्धियात संस्थागत यायेगु, न्हूगु संविधान जारी यायेगु लगायत ज्या ल्यँ दनीगुलिं राष्ट्रिय सहमतिया विकल्पा मदुगु खँ धयादीगु दु ।
विसं २०६७ क्यंगु लसताय् पुलांम्ह जुजु ज्ञानेन्द्र शाह, पुलांम्ह प्रधानमन्त्री नापं राष्ट्रिय जनशक्ति प्रजातन्त्र पार्टीया अध्यक्ष सूर्य बहादुर थापा, तराई-मधेश लोकतान्त्रिक पार्टीया अध्यक्ष महन्थ ठाकुर लगायतं नं भिंतुना सन्देश बियादिसें शान्तिया कामना याःगु दु ।
