सेनापति प्रकरणया बारे पूर्ण इजलासं निर्णय याइगु
राष्ट्रपतिया संवैधानिक भूमिकाया बारे सर्वोच्च अदालतया निम्ह न्यायाधीशत दथुइया मत पाःगु दु । निम्ह न्यायाधीशत दथुइ मत पायेवं आः पूर्ण इजलासं थुकीया बारे निर्णय याइगु जूगु दु ।
तत्कालीन सेनापति रुक्माङग कटवाल प्रकरणय् राष्ट्रपति डा. रामवरण यादवं ल्ह्वंगु पलायात असंवैधानिक जूगु धासें दायर जूगु रिट बारे मंगलवाः जूगु सुनुवाइलय् न्यायाधीश दामोदरप्रसाद शर्मा व राजेन्द्रप्रसाद कोइरालाया मत पाःगु खः ।
शर्मां राष्ट्रपतिया भूमिकाया बारे संवैधानिक न्ह्यसः अनुत्तरित त्वःते मज्यूगु तर्क तःगु खःसा कोइरालां धाःसा कटवालया अवकास नापं थ्व प्रकरण क्वचाये धुंकूगुलिं रिट खारेज जुइमाःगु खँ धाःगु दु । निम्ह न्यायाधीशत दथुइ मत पायेवं आः पूर्ण इजलासं थुकीया सुनुवाइ याइगु जूगु दु ।
उखे सरकारं मेसिन रिडेवल पासपोर्ट एमआरपी भारतयात छापे याकेबी धकाः याःगु निर्णयया पूर्ण विवरण पेश यायेत सर्वोच्च अदालतं परराष्ट्र मन्त्रलाययात निर्देशन ब्यूगु दु । भारतय् एमआरपी छापे याकेबीगु सरकारी निर्णय कानुनसम्वत मजूगु धासें थुकीया विरुद्ध रिट दायर जूगु खः । सरकारं धाःसा आइतवाः हे उगु विवादस्पद निर्णय लितकायेधुंकूगु दु ।
