एमआरपीलय् राजनीतिकरण जूगु धासें भारतया आपत्ति
भारतीय दूतावासं मेसिन रिडेवल पासपोर्ट (एमआरपी) छपाइ प्रकरणयात राजनीतिकरण याःगु व दूतावासया गोप्य पौयात प्रचार प्रसारय् हःगु धासें खेद प्वंकूगु दु ।
दूतावासं मंगलवाः छगू विज्ञप्ति पिथंसें भारतया सेक्युरिटी प्रिन्टिङ एण्ड मिन्टिङ कम्पनी व नेपाः सरकार परराष्ट्र मन्त्रालय दथुइ एमआरपी छापेयाकेगु बारे जूगु सम्भौतायात नेपाः सरकारं रद्द यायेमाःगु बुखँ प्रति दूतावासया ध्यानाकर्षण जूगु खँ न्ह्यथंसें नेपालय् थुकीयात राजनीतिकरण याःगु व दूतावसचया गोप्य पौ संचार माध्यमय् प्रचार प्रसार यायेगु खेदजनक जूगु खँ धाःगु दु ।
भारतं सरकारी सेक्युरिटी प्रिन्टिङ एण्ड मिन्टिङ कम्पनी मार्फत सहुलियत मुल्यय् निगू देय् दथुइया सद्भाव व मैत्री स्वापूयात ध्यानय् तयाः मेसीन रिडेवल पासपोर्ट आपूर्ति यायेगु सहमित याःगु खँ विज्ञप्तिइ न्ह्यथंनातःगु दु । अथेहे विज्ञप्तिइ नेपाः व भारतया स्वापू सुढृद यायेत भारत प्रतिबद्ध दुगु खँ नं न्ह्यथंनातःगु दु ।
मार्च २३, २०१०य् नेपा:या परराष्ट्र मन्त्रालय, नेपाःया सचिव व भारतीय राजदूत दथुइ आदान प्रदान जूगु पौ व मार्च २६, २०१०य् नेपा:या परराष्ट्र मन्त्रालय व सेक्युरिटी प्रिन्टिङ एण्ड मिन्टिङ कम्पनी दथुइ पासपोर्ट सम्झौताय् जूगु ल्हाःचिं कथं सेक्युरिटी प्रिन्टिङ एण्ड मिन्टिङ कम्पनी व भारत सरकारं थुकीया निंतिं ज्या शुरु यायेधुंकूगु नं धाःगु दु ।
सरकारयात थीथी थासं भारतय् एमआरपी छापे यायेगु निर्णय रद्द यायेमाःगु दबाव लायेवं सरकारं आइतवाः विवादास्पद निर्णय रद्द याःगु खः ।
