अनमिन शान्ति प्रकृया विरुद्ध जूगु गच्छदारया द्वपं
उपप्रधान नापं भौतिक योजना निर्माण मन्त्री बिजयकुमार गच्छदारं संयुक्त राष्ट्र संघीइ मिसन अनमिन शान्ति प्रकृया विरुद्ध जूगु द्वपं बियादीगु दु । वय्कंल माओवादीं याःगु दक्वं गल्ती अनमिनं सुस्केगु यानाच्वंगु धयादिसें तटस्थ भूमिका म्हिते मफुगु अनमिनया म्याद छुं नं हालतं थप मययोगु धयादिल ।
सोमवाः बहनी राजविराजय् पत्रकार सम्मेलन यानादिसें गच्छदारं अनमिन शान्ति प्रकृयायात तार्किक निष्कर्षय् थ्यंकेत नेपाः सरकराया इनाप वःगु धयादिसें सरकारयाके अनमिनया म्याद तनेगु वा मतेनेगु निर्णय यायेगु अधिकार दुगु धयादिल । वय्कलं सरकराया निर्देशनय् सुरक्षा निकायं शान्ति सुरक्षा कायम यायेत स्वःगु इलय् जुइगु गतिविधिया बारे अनमिनं अनावश्यक टिप्पणी याइगु तर माओवादीया जघन्य अपराधया बारे धाःसा छुं नं टिप्पणी मयाइगु धासें अनमिनया भूमिका प्रति असन्तुष्टि प्वंकादिल ।
मधेशी जनअधिकार फोरम लोकतान्त्रिकया अध्यक्ष नं जुयादीम्ह मन्त्री गच्छदारं तःधंगु दलत सहमतिया आधारय् संविधान निर्माण यायेत सहमत जुसाः थःगु पार्टी मधेशयात निगू ब्वलय् ब्वथलेत नं तयार जूगु धयादिल ।
