बौद्ध संघ संस्थां ध्वाँय् सहित घेरे याः वइगु

वैशाख १४ गते संविधानसभा घेराउ
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया आह्वानय् थ्वहे वइगु बैशाख १४ गते जुइगु संविधानसभा घेराउ ज्याझ्वलय् थनया थीथी बौद्ध संघ संस्थातय्सं नं ब्वति काइगु जूगु दु ।

नेवाः स्वायत्त राज्यया सुनिश्चिता, इलय् हे संविधान जारी यायेमाःगु, धर्म निरपेक्षता व संघीयता कायम यायेमाः धइगु माग न्ह्यःने तसें जुइगु उगु घेराउ ज्याझ्वलय् धर्मोदय सभा, बौद्ध विहार नापं थीथी बौद्ध संघ संस्थां थःपिनि म्हसीका सहित पिब्वयाः बौद्ध ध्वाँय् ज्वनाःब्वति काइगु खँ धाःगु दु।
उकिया नितिं मंकाः संघर्ष समितिं बौद्ध संघ संस्थातलिसे सहलह ब्याकाच्वंगु दुसा आः याकनं हे बौद्ध संघ संस्थाया दथुइ छगू मुँज्या नं जुइत्यंगु दु ।

अथे हे थीथी राज्यया माग याना वयाच्वंगु थीथी आदिवासी जनजातिया खलः पुचःतय्त नं उगु घेराउ ज्याझ्वलय् ब्वति कायेकेगु निंतिं कुतः यायेगु खँ मंकाः संघर्ष समितिया नायः सानुराजा शाक्यं कनादीगु दु। घेराउ ज्याझ्वःया निंतिं ब्यापक तयारी जुयाच्वंगु दु ।

१० गते असनय् नेवाः सभा
बैशाख १४ गते संविधानसभा घेराउ ज्याझ्वः ताः लाकेगु नितिं येँ महानगरपालिका वडा नं. २७, २८ व ३० य् मंकाः संघर्ष संयोजन समितिया थौं च्वंगु मुँज्यां बैशाख १० गते येँय् नेवाः सभा यायेगु निर्णय याःगु दु। उगु सभाय् सांस्कृतिक ब्वज्या नं जुइ धाःगु दु। अथे हे १३ गते असनं मसाल जुलुस पिकाइगु ज्याझ्वः दु। उगु हे कथं ख्वपया मंकाः संघर्ष समितिं स्थानीय नेपालभाषा कार्यकर्तातय्त मुंकाः ३ गते अन्तर्क्रिया याइगु ज्याझ्वः दुसा भ्वतय् नं ४ गते ज्याझ्वः याइगु जूगु दु ।