संविधान वइ मखुत
येँ (सन्ध्या टाइम्स)/थनिं लछि न्ह्यः तिनि जेठ १४ गते हे संविधान जारी यायेगु जुइ धकाः माओवादी अध्यक्ष व कांग्रेस अध्यक्ष सहित हस्ताक्षर यानाः विज्ञप्ति पिकयादीम्ह एमाले अध्यक्ष झलनाथ खनालं थौं वयाः जेठ १४ गते संविधान वइ मखु धयादीगु दु। थौं सुथय् नेपाल एफएमलिसे खँ ल्हासें अध्यक्ष खनालं जेठ १४ गते संविधान वइ मखुत, आः संविधान मवइगु अवस्थाय् छु यायेमाली धकाः नेतातय्सं बिचाः यायेमाः धयादिल। संविधान वइ धकाः जनतायात अप्वः झंगः लायेगु ज्या नं आः मयाःसां जिउ धासें वय्कलं धयादिल, 'आः जनता तसकं चलाख जुइधुंकल, उमित झंगः लाये फइ मखु ।'
