कटवाल काण्डया थौं अन्तिम फैसला
येँ (सन्ध्या टाइम्स)/तत्कालिन प्रधानसेनापति रुक्मांगत कटवालयात चीकेगु लागिं तत्कालिन माओवादी सरकारं याःगु निर्णय लागू मजुइ कथं राष्ट्रपति डा. रामवरण यादवं ल्ह्वनादीगु पलाःया विरुद्ध सर्वोच्च अदालतय् लानाच्वंगु रिटयात कयाः थौं अन्तिम फैसला न्यंकीगु जूगु दु। सर्वोच्च अदालतया न्यायाधीशद्वय राजेन्द्रप्रसाद कोइराला व दामोदरप्रसाद शर्माया मंकाः इजलाशं थ्व फैसला न्यंकेत्यंगु खः ।
निर्वाचित सरकारं याःगु निर्णययात राष्ट्रपतिं उल्टे याये पाय्छि मजू धासें अधिवक्ता श्रीकृष्ण सुवेदीं सर्वोच्च अदालतय् उगु रिट दायर याःगु खः ।
उगु प्रकरणयात कयाः झिंछला न्ह्यः हे रिट दायर जूगु खःसां उकिया फैसला धाःसा थौं तिनि जुइत्यंगु दु। थ्व मुद्दाय् राष्ट्रपतिपाखें करिब स्वंगू दर्जन वकिलतय्सं वहस याःगु खःसा रिटया पक्षधरतय्पाखें छगू दर्जनं बहस याःगु खः ।
उगु हे प्रकरणं यानाः तत्कालिन प्रधानमन्त्री प्रचण्डं पदं राजीनामा बियादीगु खःसां अनं लिपांनिसें हे देशया राजनीति थौं तकं स्यना वनाच्वंगु खः। माओवादीं थुकियात प्रतिष्ठाया मुद्दा दयेकूगु दु ।
