गभर्नर व चेम्बर दथुइ अर्थतन्त्र विकासया खँय् सहलह

येँ (सन्ध्या टाइम्स)/ नेपाल राष्ट्र बैंकया गभर्नर डा. युवराज खतिवडा व नेपाल चेम्बर अफ कमर्शया प्रतिनिधिमण्डल दथुइ देय्या अर्थतन्त्रा विकास व बैंक न्हूगु व्यवस्थाया बारे सहलह जूगु दु ।

नेपाल चेम्बर अफ कमर्सया नायः सुरेन्द्रवीर मालाकारया नेतृत्वय् वंगु प्रतिनिधिण्डल नापं जूगु सहलहया झ्वलय् गभर्नर खतिवडां देय्या अर्थतन्त्रया विकासय् निजी ख्यःया विकास व सहकार्य आवश्यक दुगु खःसां प्राविधिक पक्ष धाःसा प्राविधिकयात हे भाला बीमाःगु बिचाः प्वंकादीगु खः।
देय्या सीमा लागाय् जुइगु अनधिकृत व्यापारया कारणं देय्या अर्थतन्त्र व वित्तीय क्षेत्रय् खेनदयेमाःगु तरलताया अभाव दुगु बिचाः प्वंकुसे गभर्नर खतिवडां विद्यमान राजनीतिक परिस्थितिया कारणं तरलताया अभावयात झन् समस्या लाकूगु खँ धयादिल। बैंकय् ध्यबा जम्मा यायेबलय् स्रोत खुले यायेमाःगु राष्ट्र बैंकया व्यवस्थां निजी ख्यः ग्यायेम्वाःगु धासें वय्कलं उगु व्यवस्था कर प्रयोजनया निंतिं मखसे अन्तर्राष्ट्रिय मापदण्ड कथं हे नेपालं नं थ्व व्यवस्थायात लागू यानागु खँ धयादीगु खः ।

उगु इलय् गभर्नरखतिवडां थुगु व्यवस्थाय् राष्ट्र बैंकं पुनरावलोकन याये फइगु नं धयादीगु दु। नापं निजी ख्यलं फयेमालाच्वंगु समस्या ज्यंकेगु निंतिं याकनं हे निजी ख्यः, वित्तीय संघ संस्था व नेपाल राष्ट्र बैंक दथुइ स्वंगुलिं पक्षं सहलह ब्याकाः समाधानया लँपु मालेगु कुतः यायेगु नं धयादीगु दु ।

चेम्बरया नायः मालाकारं शेयरय् लगानी यायेत आव्हान याइगु इलय् माग स्वयां न्हय्दुगं च्यादुगं अप्वः ध्यबा मुनीगु तरदेय्या वित्तीय क्षेत्रय् धाःसा तरलताया अभावया खँ पिहां वयाच्वनीगु तसकं अजूचायापुगु खँ खः धयादिल। आर्थिक तरलताया अभावं देय्या समग्र औद्योगिक विकासय् समस्या जुयाच्वंगु नं अध्यक्ष मालाकारं जानकारी बियादिल।
विद्यमान समस्या व देय्या राजनीतिक परिस्थितिया कारणं छगू उद्योग बांलाक संचालन जुइमफुगुलिं निजी ख्यः प्यखेरं तःधंगु मारय् लानाच्वंगु धासें मालाकारं उद्योगी व व्यवसायीतय्सं कयातःगु त्यासाया ब्याज पुलेगु ई थप छगू अवधिया निंतिं तनेत नं गभर्नरयात इनाप यानादिल।
अध्यक्ष मालाकारं न्हापा वाणिज्य बैंकत लगानी निर्भर मजूगुलिं आः वयाः उकिया मार सकल व्यवसायीतय् फये मालाच्वंगु कारणं ब्याजदर बढे मयायेत नं इनाप याःगु खः।
उगु इलय् चेम्बरया पुलांम्ह नायः राजेशकाजी श्रेष्ठं निजी ख्यःया मनोबल थहां वनीगु कथंया नीति राष्ट्र बैंकं पित हयेमाःगु सुझाव बियादीगु खः ।