इलय् हे संविधान मवइगु संकेत
स्वंगू प्रमुख दलया शीर्ष नेतातय्सं जेठ १४ गते हे संविधान निर्माण यायेगु धकाः प्रतिबद्धता प्वंकूसां वहे प्रतिबद्धता पौलय् ल्हाःचिं तयादीम्ह नेपाली कांग्रेसया कार्यवहाक सभापति सुशील कोइरालां माओवादीया कारणं इलय् हे संविधान निर्माण मजुइफुगु खँ धयादीगु दु ।
सोमवाः राष्ट्रिय प्रजातन्त्र जनशक्ति पार्टीया अध्यक्ष सूयबहादुर थापा नापया खँल्हाबंला लिपाः वय्कलं माओवादीं न्हापा याःगु सहमति पालना यायेत इच्छा मक्यंगु धयादिसें इलय् हे संविधान निर्माण जुइ थाकुइगु खँ धयादीगु खः ।
कोइराला निवास महाराजगंजय् जूगु खँल्हाबंला लिपाः कांग्रेस उपसभापति रामचन्द्र पौडेल नं इलय् हे संविधान मजुइगु संकेत बियादिल । वय्कलं थापानापया खँल्हाबंलाय् जेठ १४ गते संविधान जुइगु खँय् ढुक्क जुइमफुगु कनादिल ।
संविधान निर्माणय् थीथी कच्वं वयाच्वंगु धयादिसें नेता पौडेलं जेठ १४ गते हे संविधान जारी जुइगु धकाः ढुक्क जुइगु अवस्था मदुगु धयादिल । नापं वय्कलं अज्याःगु अवस्था वःसा छु यायेफइ धइगु बारे दक्वं पार्टीनाप परामर्श जुयाच्वंगु कनादिल ।
