जनप्रदर्शन लोकप्रिय : माओवादी

एकीकृत नेकपा (माओवादीं) राष्ट्रपतिया असंवैधानिक पलाः धुकां आः तक यानावयाच्वंगु जनप्रदर्शन तसकं सफल जूगु व लोकप्रिय जूगु निष्कर्ष पिकागु दु ।

सोमवाः माओवादी मू ज्याकू पेरिस डाँडाय् च्वंगु पार्टी स्थायी समितिया बैठकं जनप्रदर्शया बारे मुल्यांकन यासें थंज्याःगु निष्कर्ष पिकागु खः । अथेहे माओवादीं इलय् हे संविधान निर्माण यायेत दबाव बीगु कथं लेनिनि दिवस व मे दिवस कुन्हु तःजिगु जनप्रदर्शन यायेगु निर्णय नं याःगु दु ।

अथेहे बैठकं संविधान निर्माण व शान्ति प्रकृयायात निष्कर्षय् थ्यंकेत वर्तमान सरकार बाधक जूगु धासें इलय् हे संविधान जारी यायेत माओवादीं थप पहल यायेगु निर्णय याःगु दु । नापं माओवादीं सत्तारुढ कांग्रेस व एमालेया आन्तरिक द्वन्द्वया कारणं संविधान निर्माण यायेगु ज्या न्ह्याः वनेमफुगु निष्कर्ष पिकागु दु ।