सम्झौता पालना याःसा समस्या समाधन जुइ : निधि
नेपाली कांग्रेसया महामन्त्री विमलेन्द्र निधिं माओवादीं न्हापा याःगु सम्झौतात पूर्ण रुपं पालना याःसा वर्तमान समस्य समाधान जुइगु खँ धयादीगु दु ।
सोमवाः चितवनया भरतपुरय् पत्रकारतनाप खँल्हाबंला यानादिसें नेता निधिं सम्झौता पालना मयाःगु कारणं हे संविधान निर्माण यायेगु ज्या लिबागु धयादिसें माओवादी शान्ति प्रकृया त्वःता सहमति विपरीत थःगु नेतृत्वया सरकार गठन यायेगुली लगे जुयाच्वंगु द्वपं बियादिल ।
वय्कलं छुं न्हि न्ह्यः उच्चस्तरीय राजनीतिक संयन्त्रया बैठकय् जूगु सम्झौता तकं माओवादी पालना मयाःगु धयादिसें कांग्रेस नापं मेमेगू दल सहमति पालना यायेत तयार जूगुलिं माओवादी नं सहमति पालना यायेत तयार जुइमाःगु धयादिल । अथेहे नेता निधिं सहमति पालना जुसाः जक जेठ १४ गते दुने संविधान निर्माण जुइगु दावी यानादिसें सहमति पालनाया विकल्प मदुगु धयादिल ।
