सर्वोच्चय् एमआरपी बारे सुनुवाइ मंगलवाः
मेसिन रिडेबल पासपोर्ट (एमआरपी) भारतयात छापे याकेबीगु निर्णया विरुद्ध सर्वोच्च अदालतय् दयार जूगु निगू बिस्कं बिस्कं मुद्दाया सम्बन्धय् मंगलवाः जक सुनुवाइ जुइगु जूगु दु । सोमवाः हे थुकीया बारे सुनुवाइ जुइगु ज्याझ्वः दुगु खःसां ई अभावया कारणं थुकीया बारे मंगलवाः जक निर्णय जुइत्यंगु खः ।
एमआरपी स्वयां न्ह्यःया मुद्दाया बारे न्यायाधिश दमोदर शर्माया इजलासं सुनुवाइ यायेमाःगुलिं एमआरपीया सुनुवाइ मंगलवाः तकया निंतिं स्थगित जूगु खः । थ्वस्वयां न्ह्यः सार्वोच्चं एमआरपी भारतय् छापे याकेबीगु निर्णय विरुद्ध दयार जूगु रिटय् चैत २५ गते अन्तरिम आदेश जारी यासें थप सुनुवाइया निंतिं निगुलिं पक्षयात थौं सःतुगु खः ।
भारतय् एमआरपी छापे याकेबीगु सरकारी निर्णय कानुनसम्वत मजूगु धासें थुकीया विरुद्ध निगू बिस्कं बिस्कं रिट सर्वोच्चय् दयार जूगु खःसा सरकारं आइतवाः हे उगु विवादस्पद निर्णय लितकायेधुंकूगु दु ।
