सेना समायोजन बारे खुगू दललिसे सहलह
येँ (सन्ध्या टाइम्स)/माओवादीया जनसेना रेखदेख, पुनःस्थापना नापं समायोजन विशेष समितिं थौं संविधानसभाया ततःधंगु खुगू दलया शीर्ष नेतातलिसे सहलह ब्याकीगु जूगु दु ।
थौं सनिलया ३ बजे सिंहदरवारय् सःतूगु उगु मुँज्याय् जनसेनाया समायोजन व पुनःस्थापनाया सवालय् ब्वलनाच्वंगु कचवं चीकेगु कुतः जुइ धकाः समितिया दुजः नापं माओवादीया नेता जनार्दन शर्मा प्रभाकरं धयादीगु दु। मुँज्याय् माओवादीं सेना समायोजनया निंतिं तःगु विकल्प व समायोजन सम्बन्धी प्रधानमन्त्रीया कार्ययोजनाया बारे सहलह जुइ धकाः नं धाःगु दु ।
माओवादीं नेपाली सेनाय् वनेत चाहे जूपिं जनसेनायात सेनाय् हे समायोजन यायेगु, जनसेनायात ब्यागलं कथंया विशेष फोर्स दयेकेगु अथवा जनसेना गुलि दु उलि हे ल्याखय् नेपाली सेना, सशस्त्र व जनपद प्रहरीयात दुथ्याकाः मेगु हे छगू ब्यागलं फोर्स दयेकेगु प्रस्ताव तःगु खः ।
माओवादीं छेँय् लिहां वनीपिं जनसेनाया प्रत्येक जवानयात म्हतिं १० विगाहा जग्गा व २० लाख तका दां बीगु प्रस्ताव तःगु खः। सरकारं धाःसा आर्थिक उपार्जनया निंतिं तालिम जक बी फइ धकाः माओवादी प्रस्तावयात अस्वीकार याःगु दु। अथे हे मुँज्याय् प्रधानमन्त्रीं तःगु प्रस्तावया बारे नं सहलह जुइगु खँ धाःगु दु ।
