सभासदं हे संविधानसभा घेरे याइगु
वैशाख १४ गते संविधानसभा घेराउ
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया आह्वानय् वइगु बैशाख १४ गते जुइगु संविधानसभा घेराउ ज्याझ्वलय् नेवाः सभासदतय्सं नं ब्वति काइगु जूगु दु। नेवाः स्वायत्त राज्य व इलय् हे संविधान निर्माणया निंतिं याइगु उगु घेराउ ज्याझ्वलय् नेवाः सभासदपिंत नं ब्वति कायेकेत संघर्ष समितिं वइगु बैशाख २ गते नेवाः सभासदपिंलिसे ब्यागलं सहलह मुँज्या याइगु जूगु दु। उगु मँज्याय् संविधानसभा घेराउ ज्याझ्वलय् नेवाः सभासदपिंसं म्हितीगु भूमिका नापं नेवाः आन्दोलनया बारे सहलह जुइ धाःगु दु ।
संविधानसभाय् थौंकन्हय् फुक्कं यानाः ३२ म्ह नेवाः सभासदत दु। इपिं मध्ये नेवाः स्वायत्त राज्यया निंतिं मंकाः कथं ल्वाये धकाः मंकाः संघर्ष समितिं दयेकूगु प्रतिवद्धता पतिइ २२ म्ह नेवाः सभासदतय्सं ल्हाःचिं तयाः सार्वजनिक रुपं प्रतिवद्धता प्वंकादीधुंकूगु दु। घेराउ कुन्हु नेवाः सभासद्तय्सं दुने नं सः तइगु खँ दु ।
