बन्द लितकाःसां सुथय् लिच्वः
येँ (सन्ध्या टाइम्स)/म्हिगः बहनी निक्वः तक मन्त्रिपरिषद्या बैठक च्वनाः एमआरपी भारतय् छापे याके बीगु धकाः न्हापा याना तःगु निर्णय लित कायेवं माओवादीं घोषणा यानातःगु थौंया नेपाल बन्द ज्याझ्वः नं लित काःगु दु। तर बन्द लित काःसां थौं सुथय् तकं सर्वसाधारण धाःसा प्रभावित जुयाच्वंगु खनेदत ।
माओवादीं म्हिगः बहनी तिनि थौंया बन्द ताः लाकेत इनाप यासें रत्नपार्क लागाय् तःधंक मसाल जुलुस पिकाःगु खः। उगु बन्दं यानाः म्हिगः येँया यातायात नापं प्रभावित जूगु खः। तर बहनी हे लिबाक मन्त्रिपरिषदया निर्णय धकाः सरकारं भारतय् पासपोर्ट छापे याकेगु निर्णय रद्द यायेवं माओवादीया नेतातय्सं नं सरकारया उगु निर्णययात सकारात्मक रुपं कासें बहनी हे बन्द लित कयागु घोषणा याःगु खः। तर बन्द लित कायेधुंकूगु खँ मनूतय्सं मसियाः थौं सुथय् चले जुइमाःगु गुलिखे यातायात पिहां मवःगु खः। लिसें थौं सुथय् सञ्चालन गुलिखे क्याम्पसय् पढाई नं बन्द जूगु खः। लिपा फुक्क संचार माध्यमं बन्द लित काःगु खबर बीवं तिनि गाडीत पिहां वयेगु शुरु जूगु खः ।
