न्हापांगु राष्ट्रिय शाक्य सम्मेलन
येँ (सन्ध्या टाइम्स)/राष्ट्रिय शाक्य समाजया ग्वसालय् निन्हुयंकं येँय् जूगु न्हापांगु शाक्य सम्मेलन क्वचाल। शाक्य जाति मध्ये दकलय् थकालिम्ह प्यक्वः जंको यायेधुंकूम्हु मय्जु कालुमाया शाक्य (१०१ दँ) व भाजु भाजुरत्न शाक्य (९६ दँ) पाखें सम्मेलनया उलेज्या जूगु खः। वय्कःपिंसं शाक्य समाजया ब्यानर उलाः ज्याझ्वः उद्घाटन यानादीगु खः ।
ज्याझ्वः पुलांम्ह मन्त्री नापं राष्ट्रिय शाक्य समाजया नायः प्रेम बहादुर शाक्यया सभापतित्वय् जूगु खःसा ज्याझ्वलय् भिक्षु अश्वघोष महास्थविरं पञ्चशील प्रार्थना यानाबिज्याःगु खः। लिसें निम्हं थकालिपिंत बेतालिं चिकाः हनेज्या नं जूगु खः ।
ज्याझ्वलय् समाजया महासचिव प्रा. सुवर्ण शाक्यं राष्ट्रिय शाक्य समाजया उद्देश्य, लक्ष्य व कार्यविधि सहितया प्रतिवेदन न्ह्यब्वयादीगु खः। अथे हे सहकोषाध्यक्ष पुष्परत्न शाक्यं समाजया आर्थिक प्रतिवेदन न्ह्यब्वयादिल।
ज्याझ्वःया निन्हु कुन्हु नांजाःम्ह पर्यटन व्यवसायी कर्ण शाक्यं आर्थिक रुपं शाक्यत आत्मनिर्भर जुइमाःगु विषयय् नुगःखँ प्वंकादीगु खः। लिसें भिक्षु ज्ञानपुर्णिक महास्थविरं धर्म व न्यायया विषयय् न्ववानाबिज्यात ।
उगु सत्रय् शाक्यतय् थीथी पक्षया प्यंगू विषय दयेकाः पुचः सहलह नं याकूगु खः। उकी शाक्यतय् पुजा आजा व हनेमाःगु परम्परा, पेशातय् परम्परा पेशा व आर्थिक अभिवृद्धि, शाक्य समाजय् यायेमाःगु सुधार व विकास अले समाजया उद्देश्य व विधान यानाः प्यंगू विषय दयेकाः सहलह ब्याकूगु खः। पुचः सहलहपाखें पिहां वःगु लिच्वःयात कयाः महासचिव सुवर्ण शाक्यं समिक्षा यानादिल ।
शाक्यतय् उगु न्हापांगु ऐतिहासिक सम्मेलनय् थीथी ख्यलय् च्वनाः विशिष्ट योगदान याना वयाच्वंपिं विशिष्ट शाक्य व्यक्तित्वपिनि नं उपस्थिति दुगु खः। उकी यल उपमनपाया पुलांम्ह मेयर बेखारत्न शाक्य, पुलांम्ह मुख्य सचिव तिर्थमान शाक्य, नेपाः राष्ट्रिय पार्टीया नायः डा. केशवमान शाक्य, भिक्षुगण आदिपिनि उपस्थिति दुगु खः ।
सम्मेलनय् देय्न्यंकंया नीन्यागू जिल्लां वःपिं प्रतिनिधितय्सं मंकाः रुपं बोधिमत च्याकेगु ज्या याःगु खः। लिसें शाक्यवंशया ज्याथजिथिपिंत बाजं सहित गाडीइ तयाः क्वःने लागा चाःहीकेगु ज्या नं जूगु खः ।
भगवान बुद्धया वंश कथं म्हसिउपिं शाक्य जातिया जातीय, भाषिक अधिकार सुरक्षित यासें शाक्य समाजयात अझ प्रगतिया लँय् न्ह्याकेगु ताः तयाः देन्यंकंया शाक्यतय्त छधी यायेगु उद्देश्य सहित शाक्य समाज नीस्वंगु खः। देय्न्यंकंया शाक्यत छथाय् च्वनाः थज्याःगु सम्मेलन याःगु थ्वहे न्हापांखुसी खः। थ्व अधिवेशन धुंकाः शाक्य प्रोफाइल पिथनेगु, शाक्यतय् दथुइ सांस्कृतिक विविधता मदयेकेगु, शाक्यतय्त लजगाः चूलाकेगु, शिक्षा, स्वास्थ्य व आर्थिक पक्ष बल्लाकेगु आदि ज्याझ्वःत न्ह्याकेगु ताः तयातःगु दु ।
