अनेरास्ववियु नेतायात त्रिचन्द्रय् आक्रमण
मोटरसाइकलय् वःपिं अज्ञात पुचलं त्रिचन्द्र क्याम्पसया विद्यार्थी नेता समिप बडालयात सोमवाः आक्रमण याःगु दु । उगु आक्रमणय् लाना: एमाले समर्थित अनेरास्ववियु क्याम्पस इकाइ सभापति बडाल नापं न्हय्म्ह घाःपा जूगु दु ।
स्वंगः मोटारसाइकलय् वःपिं अज्ञात पुचलं मोटरसाइकल क्यापस पिने हे दिकाः क्याम्पसया बास्केटबल कोर्टय् दुपिं बडाल सहित विद्यार्थीतय्त खुकुरी आक्रमण याःगु खः । आक्रमणय् लानाः बडालया ख्वाः व म्हया थीथी थासय् घाः जूगु दु । बडालयात येँया मोडल अस्पतालय् वासः याकातःगु दु । चिकित्सकतय्सं वय्कया अवस्था खतरामुक्त दुगु खँ धाःगु दु ।
आक्रमणया विरोधय् विद्यार्थीतय्सं घण्टाघर क्षेत्रय् प्रदर्शन यायेगु नापं क्याम्पसय् नं तोडफोड याःगु दु । प्रहरीं आक्रमणकारीतय् पहिचान जुइधुंकूगु खँ धाःगु दु ।
उखे नुवाकोटय् माओवादीया कार्यकर्तातय्सं आइतवाः बहनी नेविसंघया जिल्ला उपाध्यक्ष सहित स्वम्हेसित आक्रमण याःगु दु । आइतवाः सनिलय् बागेश्वरी गाविसया बागेश्वरी उच्चमाविया व्यवस्थापन समितिया निर्वाचन जुयाच्वंगु इलय् माओवादी कार्यकर्तातय्सं उपाध्यक्ष सच्युतराज महन्थ गिरी, जिल्ला दुजः सन्तोष उप्रेती व रामजी पौडेलयात आक्रमण याःगु खः । आक्रमणया विरोधय् नेविसंघं माओवादी ज्यादतिया भत्सना यासें दोषीयात तत्काल कारवाहीया माग याःगु दु ।
