सरकारं भारतय् एमआरपी छापे यायेगु निर्णय लितकाल
माओवादीं नं नेपाल बन्द लितकाल
थीथी क्षेत्रं तच्वयेक विरोध यायेवं सरकारं भारतयात मेसिन रिडेवल पासपोर्ट (एमआरपी) छापे याकेबीगु निर्णय लितकाःगु दु । आइतवाः बहनी निक्वःगु पटक च्वंगु मन्त्रिपरिषदया बैठकं एमआरपी भारतय् छापे यायेबीगु निर्णय लितकाःगु खँ सरकारी प्रवक्ता शंकर पोखरेलं कनादिल ।
थ्वस्वयां न्ह्यः आइतवाः सनिलय् च्वंगु बैठकय् परराष्ट्रमन्त्री सुजाता कोइराला अनुपस्थित जुइवं हानं मन्त्रिपरिषदया बैठक च्वनाः थुगु निर्णय याःगु खः । संसदया सार्वजनिक लेखा समितिं प्रतिस्पर्धाया आधारय् एमआरपी छापे यायेमाःगु धासें सरकारी निर्णय लितकायेत स्वक्वः तक निर्देशन ब्यूगु खः । अथेहे सर्वोच्च अदालतं नं मन्त्रिपरिषदया चैत ६ गतेया बैठकं भारतयात एमआरपी छापे याकेगु धका: या:गु निर्णय तत्काल कार्यान्वयन मयायेत निर्देशन ब्यूगु खः ।
थ्वहे दथुइ माओवादीं एमआरपी भारतय् छापे यायेगु सरकारी निर्णय लितकायेमाःगु माग यासें सोमवाः आह्वान याःगु नेपाल बन्द ज्याझ्वः लितकाःगु दु । सरकारं नेपाली जनता व माओवादीया दबाबय् उगु निर्णय लितकाःगु ज्या सकारात्मक धासें माओवादी बन्द ज्याझ्वः लितकाःगु खः ।
आइतवाः न्हापांगु पटक प्रधानमन्त्री निवास बालुवाटारय् च्वंगु मन्त्रिपरिषदया बैठकं राष्ट्रिय योजना आयोगया उपाध्यक्षय् जगदिशचन्द्र पोखरेल व आयोगया दुजःलय् गणेश गुरुङयात नियुक्त याःगु दु । अथेहे सञ्चय कोषया अध्यक्षय् माधव पौडेलया नियुक्त याःगु दु ।
अथेहे बैठकं पाठ्यपुस्तकया तथ्याङ्कया हिलावुला यानाः मुद्रणया निंतिं भारत छ्वयाः निगू करोड भ्रष्टाचार याःगु उजुरी लाम्ह जनक शिक्षा सामाग्री केन्द्र लिमिटेडया प्रबन्ध सञ्चालक वीरेन्द्रकुमार दासयात कारवाही प्रकृया न्ह्याकेत सम्बन्धित मन्त्रालययात निर्देशन ब्यूगु दु ।
बैठकं सैनिक हवाई महानिर्देशनालय दयेकेगु सैद्धान्तिक सहमति याःगु दुसाः डुडेझारी घटनाया बारे अध्ययन ययोगु अयोगया म्याद तनेगु निर्णय नं याःगु दु ।
