कांग्रेस व एमाले विदेशी आकाशवाणी पियाच्वन : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' कांग्रेस व एमाले विदेशीया इसाराय् चलेजुयाच्वंगुलिं संविधान निर्माण यायेत लिबानाच्वंगु द्वपं बियादीगु दु । वय्कलं धयादिल, 'कांग्रेस व एमाले विदेशीया आकाशवाणी पियाच्वंगुलिं संविधान च्वयेगु ज्या दिनाच्वंगु खः ।'
सामुदायिक वन उपभोक्ता महासंघया वनयात्रा ज्याझ्व: कथं आइतवाः हेटौंडाय् जूगु क्षेत्रिया आमसभायात सम्बोधन यानादिसें वय्कलं कांग्रेस व एमालें चाहे जूसाः याकनं संविधान च्वयेफइगु धयादिसें निगू दल सहमतिलय् वसाः लछिया दुने संविधान निर्माण यायेफइगु दावी यानादिल ।
सहमतिय प्रणालीयात त्वाःथला बहुमतीय प्रणालीलय् सत्ताधारीत वंगुलिं सहमतिय वातावरण स्यंगु धयादिसें प्रचण्डं वर्तमान सरकार इतिहासया हे कलंक जूगु टिप्पणी यानादिल । छगू लिपा मेगू अनियमितता क्यनाच्वंगु सरकारं एमआरपी भारतय् छापे याकेबीगु निर्णय यानाः इतिहासय् हे कलंक जूगु प्रमाण् क्यंगु दावी यानादिल ।
अथेहे सभाय् कांग्रेस महामन्त्री विमलेन्द्र निधिं माओवादी व मेमेगू दलत दथुइया मतभिन्नताया कारणं नागरिकत अन्यौलय् लाःवंगु धयादिसें माओवादी बहुदलीय प्रतिस्पर्धाय् वनचाहे मजूगुलिं संवैधानिक समितिं ज्या यायेमफुगु धयादिल ।
एमाले सचिव युवराज ज्ञवालीं न्हापाः जूगु सहमति व सम्झौता कार्यान्वयन जुसाः एमाले सरकार त्वःतेत तयार जूगु धयादिल । वय्कलं न्हापा माओवादी पाखें थ्व ज्या मजूगु व संविधानसभाय् खनेदुगु रिक्तता पूवंकेत एमालें सरकारया नेतृत्व याःगु धयादिल ।
