'झंग मल्हासें धायेगु खःसा जेठ १४य् संविधान निर्माण जुइमखु'
नेपाली कांग्रेसया वरिष्ठ नेता शेरबहादुर देउवां जेठ १४ गते दुने संविधान निर्माण मजुइगु व शान्ति प्रकृया नं पूमवनीगु खँ धयादीगु दु ।
सामुदायिक वन उपभोक्ताया वनयात्राया झ्वलय् आइतवाः धनगढीलय् ग्वसाःग्वःगु क्षेत्रीय जनसभाय् न्ववानादिसें नेता देउवां धयादिल, 'जिं मखुगु खँल्हायेमखु, उकीं झंग मल्हासें धायेगु खःसा जेठ १४य् संविधान निर्माण जुइमखु व शान्ति प्रकृया नं पूमवनी मखु ।'
वय्कलं सत्ताया निंतिं तानातान व मारामार याये त्वःताः संविधान च्वयेगु व स्थायी शान्ति स्थापना यायेगु पाखे लगे जुइत दक्वसित इनाप यानादिल । वय्कलं माओवादीयात न्हापा सरकारं पिहांवनेमाःगु खँ ल्वमंकाः दय्यात निकास बीत नं इनाप यानादिल ।
प्रधानमन्त्री पद धइगु वइगु वनीगु खँ जूगु धयादिसें नेता देउवां माओवादीं प्रधानमन्त्री माल धकाः अडान कायेगु स्वयां दकलय् तःधंगु दल जूगुलिं शान्ति स्थापना व संविधान च्वयेगु पाखे जिम्मेवार जुइमाःगु धयादिल ।
अथेहे वय्कलं कांग्रेस राष्ट्रपति वा सैनिक शासनया पक्षय् वनेमफइगु धयादिल । वय्कलं राणाकालया विपक्षय् ल्वाःगु पार्टी सैनिक शासनया पक्षय् वनेफइला धकाः न्ह्यसः तयादिल । नापं वय्कलं लोकतन्त्रय् विश्वास याइगु पार्टी जूगुलिं कांग्रेस सर्वसत्तावादी शाहनया पक्षय् वनेमफइगु धयादिल ।
