भारतयात एमआरपी छापे याकेगु निर्णय लितका : एमाले
नेकपा (एमाले)या संसदीय दलया बैठकं सरकारयात भारतयात मेसिन रिडेवल पासपोर्ट (एमआरपी) छापे याकेगु निर्णय लितकायेत इनाप याःगु दु ।
अइतवाः च्वंगु एमाले संसदीया दलया बैठकं सरकारया निर्णय सार्वजनिक खरिद ऐन विपरित जूगु ठहर यासें सरकारयात उगु इनाप याःगु खः । नापं बैठकं पुलांगु निर्णय रद्द यानाः प्रतिस्पर्धाया आधारय् एमआरपी छापे याकेबीमा:गु निर्णय याःगु दु ।
सिंहदरवारय् दुगु पुलांगु प्रतिनिधि सभाकक्षय् जूगु बैठकय् आइतवाः नं न्ववापिं अधिकाशं सभासद्तय्सं सरकारया तच्वकं आचोलना या:गु दु । सभासद्तय्सं सरकारं राष्ट्रिय सहमतिया निंतिं पहल यायेमफुगु धासें सरकारया कुंखिगु खः ।
आइतवाःया बैठकय् न्ववाःपिं झिंस्वम्ह सभासद्तय्सं संविधान निर्माणया निंतिं सरकारं प्रभावकारी ज्या यायेमफुगु धासें राष्ट्रिय सहमतिया निंतिं सरकारं राजीनामा बियाः सहमतिया लँपू चायेकेत उमिसं इनाप याःगु खः । सभासद्त कुलप्रसाद नेपाल, दलबहादुर राना, रामचन्द्र झा लगायत सभासद्तय्सं सरकारया ज्या प्रभावकारी मजूगु धासें सरकारया कुंखिंगु खः ।
बैठकय् सभासद्तय्सं न्ववायेगु ज्या अझ क्वमचानिगुलिं मेगू बैठक २०६७ बैशाष १ गते च्वनीगु जूगु दु ।
