बन्द लितकायेत उद्योगीतय् इनाप
बन्दया झ्वलय् अत्यावस्यक सवारीलय् अवरोध मयाइगु
सरकारया मेसिन रिडेवल पासपोर्ट (एमआरपी) भारतय् छापे याकेगु निर्णय विरुद्ध प्रमखु प्रतिपक्षी दल एनेकपा (माओवादीं) कन्हय् यायेत्यंगु नेपाल बन्दया ज्याझ्वः लितकायेत उद्योगी व्यवसायीतय्सं इनाप याःगु दु ।
आइतवाः नेपाल पर्यटन बोर्डय् याःगु पत्रकार सम्मेलनय् नेपाल उद्योग वाणिज्य महासंघया अध्यक्ष कुशकुमार जोशीं नेपाःया राजनीतिक दलतय्सं बन्द हड्ताल थंज्याःगु ज्या मयायेगु धकाः प्रतिबद्धता प्वंकेधुंकूगु खँ हलिमय् हे थ्यनेधुंकूगु धयादिसें हानं राजनीतिक दलतय्सं बन्द याःसा इमिगु विश्वशनियताय् न्ह्यसः थनेगु थाय् दइगु धयादिसें माओवादीयात कन्हय्या बन्द लितकायेत इनाप यानादिल ।
नेपाः पर्यटन दँ २०११या निंतिं नेपाःया राजनीतिक दलतय्सं पर्यटन दँया इलय् बन्द हड्ताल थंज्याःगु ज्या मयायेगु प्रतिबद्धता सहित ल्हाःचिं तःगु खः ।
थ्वहे दथुइ माओवादी प्रवक्ता दिनानाथ शर्मा छगू विज्ञप्ति पिथनादिसें बन्दया झ्वलय् अत्यावस्यक सवारी चले जुइबीगु खँ धयादीगु दु । वय्कलं आइतवाः पिथंगु विज्ञप्तिइ बन्दया इलय् पत्रकार, कुटनीतिक नियोग, मानवअधिकारवादी संघसंस्थाया सवारी साधन, स्वास्थ्य सेवा नापं एम्बुलेन्सया आवतजावतय् छुं नं कथं अवरोध मयायेगु खँ धयातःगु दु ।
व्यवस्थापिका संसदया लेखा समितिया निर्देशन विपरीत संसदया विशेषाधिकारया हनन् जुइ कथं सरकारं राष्ट्रिय सुरक्षाया हितविपरित एमआरी भारतयात छापे याकेबीगु निर्णय लितकायेमाःगु माग यासें माओवादीं सोमवाः नेपाः बन्दया घोषणा याःगु दु ।
